शाळेचा पहिला दिवस ठरणार आनंदाचा उत्सव;चिमुकल्यांचे सोमवारी होणार जल्लोषात स्वागत

*बांदा*

दीड महिन्यांच्या उन्हाळी सुट्टीनंतर सन २०२६-३७या उद्यापासून जिल्ह्यातील शाळांचे बंद दरवाजे पुन्हा उघडणार असून, शांत असलेल्या वर्गखोल्या आणि अंगणे पुन्हा एकदा विद्यार्थ्यांच्या निरागस हास्याने, गप्पागोष्टींनी आणि किलबिलाटाने भारून जाणार आहेत.
नवीन शैक्षणिक वर्षाच्या स्वागतासाठी शाळा सजल्या असून, विशेषतः पहिलीत प्रवेश घेणाऱ्या चिमुकल्यांसाठी हा दिवस आयुष्यभर लक्षात राहणारा ठरणार आहे.
पहिल्यांदाच शाळेच्या उंबरठ्यावर पाऊल ठेवणाऱ्या चिमुकल्यांच्या मनात उत्सुकता, आनंद, कुतूहल आणि थोडीशी धास्तीही असते. आई-वडिलांचा हात घट्ट धरून शाळेत येणाऱ्या या लहानग्यांना प्रेमाने, आपुलकीने आणि आनंदाने सामावून घेण्यासाठी शिक्षकांनी विशेष तयारी केली आहे. कारण शाळेचा पहिला दिवस हा केवळ शिक्षणाचा आरंभ नसून, आयुष्याच्या नव्या प्रवासाची सुरुवात असते.
शाळा परिसर आकर्षक सजावट, रंगीबेरंगी रांगोळ्या, फुलांच्या कमानी आणि स्वागत फलकांनी नटला आहे. काही ठिकाणी विद्यार्थ्यांचे औक्षण करून, फेटे बांधून, पुष्पवृष्टी करत आणि टाळ्यांच्या गजरात त्यांचे स्वागत करण्यात येणार आहे. ‘पहिले पाऊल’ या उपक्रमांतर्गत चिमुकल्यांच्या पावलांचे ठसे जतन करून त्यांच्या शैक्षणिक जीवनातील पहिला क्षण संस्मरणीय बनविण्याचा प्रयत्न केला जाणार आहे.
घारपी शाळेचे राज्य आदर्श शिक्षक पुरस्कार प्राप्त शिक्षक जे. डी. पाटील म्हणाले, “या वर्षी शाळेचा पहिला दिवस विद्यार्थ्यांसाठी आनंदोत्सवासारखा साजरा केला जाणार आहे. शाळेत येणाऱ्या प्रत्येक बालकाच्या चेहऱ्यावर हास्य फुलावे, शिक्षणाबद्दल प्रेम निर्माण व्हावे आणि त्यांचा शैक्षणिक प्रवास उत्साहाने सुरू व्हावा, यासाठी आम्ही सर्वजण प्रयत्नशील आहोत.”
पहिल्याच दिवशी विद्यार्थ्यांना मोफत पाठ्यपुस्तके, गणवेश आणि इतर शैक्षणिक साहित्याचे वितरण करण्यात येणार आहे. विविध मान्यवर, शिक्षणप्रेमी, पालक आणि ग्रामस्थांच्या उपस्थितीत विद्यार्थ्यांचे स्वागत करून त्यांना प्रोत्साहन दिले जाणार आहे.
नवीन पुस्तके हातात घेण्याचा आनंद, नवीन मित्र-मैत्रिणी भेटण्याची उत्सुकता, नवीन वर्गात बसण्याचे कुतूहल आणि शिक्षकांच्या प्रेमळ सहवासाची ओढ यामुळे प्रत्येक विद्यार्थी आनंदाने भरून गेला आहे. सोमवार पुन्हा एकदा शाळांचे अंगण फुलणार आहे, वर्गखोल्या जिवंत होणार आहेत आणि ज्ञानमंदिरांमध्ये नव्या स्वप्नांची, नव्या आशांची आणि नव्या यशकथांची सुरुवात होणार आहे.

*शाळेचा पहिला दिवस केवळ शाळा सुरू होण्याचा नाही, तर हजारो चिमुकल्या स्वप्नांना पंख फुटण्याचा, नव्या उमेदेने उभारी घेण्याचा आणि शिक्षणाच्या प्रकाशमय वाटेवर पहिले पाऊल टाकण्याचा उत्सव ठरणार आहे.*
श्री जे.डी.पाटील
राज्य आदर्श शिक्षक व मुख्याध्यापक शाळा घारपी