*जागतिक साहित्य कला व्यक्तित्व विकास मंचच्या सन्मा सदस्या ज्येष्ठ लेखिका कवयित्री मानसी जामसंडेकर लिखित अप्रतिम अभंग*

*अंतरीची वारी*

जप विठ्ठलाचा I असे अहोरात्र I

चैतन्यात गात्र I ईशावासे ! II १ II

करताना ऊरी I अंतरीची वारी I

रामकृष्णहरी I मुखी जप ! II २ II

दळता कांडता I ओवी अभंगात I

देव अंतरात I अहर्निश ! II ३ II

भावाची सुमने I श्रद्धेचं चंदन I

भक्तीत मंथन I सदोदित ! II ४ II

अंतरीची वारी I जरी नसे पायी I

ईश ठायी ठायी I मनांतरी ! II ५ II

नसे चंद्रभागा I नि पंढरपूर I

भावातीत सूर I अंतरंगी ! II ६ II

श्रद्धाभाव मनी I अंतरीची वारी I

भवाब्धीत तारी I भक्तांलागी ! II ७ II

*मानसी जामसंडेकर, गोवा*