ना. नितेश राणे यांच्या वाढदिवसानिमित्त पडेल मंडळात सामाजिक उपक्रमांची रेलचेल

अंगणवाडी बालकांना खेळणी, मोफत आधार-फार्मर आयडी कॅम्प तसेच विकासकामांचे भूमिपूजन व लोकार्पण

देवगड 

सिंधुदुर्ग जिल्ह्याचे पालकमंत्री तथा मत्स्यव्यवसाय व बंदरे विकास मंत्री ना. नितेश राणे यांच्या वाढदिवसानिमित्त दि. 23 जून 2026 रोजी पडेल मंडळात विविध सामाजिक, शैक्षणिक आणि विकासाभिमुख उपक्रमांचे आयोजन करण्यात आले आहे. समाजोपयोगी कार्यक्रमांच्या माध्यमातून वाढदिवस साजरा करण्याचा संकल्प भाजप पडेल मंडळाने केला असून संपूर्ण परिसरात उत्साहाचे वातावरण निर्माण झाले आहे.

अंगणवाडी बालकांना खेळणी व सेविकांना छत्री वाटप

पोंभुर्ले जिल्हा परिषद गटात आयोजित करण्यात आलेल्या विशेष उपक्रमांतर्गत 33 अंगणवाडी केंद्रांतील सुमारे 170 बालकांना शैक्षणिक साहित्य व खेळण्यांचे वाटप करण्यात येणार आहे. तसेच पावसाळ्याच्या पार्श्वभूमीवर अंगणवाडी सेविका आणि मदतनीस यांच्या कार्याचा गौरव म्हणून त्यांना छत्री वाटप करण्यात येणार आहे.

पुरळ गटात मोफत आधार व फार्मर आयडी शिबिर

पुरळ जिल्हा परिषद गटात नागरिक आणि शेतकऱ्यांसाठी मोफत आधार कार्ड नोंदणी व दुरुस्ती तसेच फार्मर आयडी (शेतकरी ओळखपत्र) कॅम्पचे आयोजन करण्यात आले आहे. या शिबिरामुळे नागरिकांना आवश्यक शासकीय कागदपत्रांची पूर्तता एकाच ठिकाणी करता येणार आहे.

विकासकामांचे भूमिपूजन आणि लोकार्पण

पडेल आणि बापार्डे जिल्हा परिषद गटात मंजूर झालेल्या विविध विकासकामांचे भूमिपूजन आणि पूर्ण झालेल्या कामांचे लोकार्पण यावेळी करण्यात येणार आहे. पालकमंत्री नितेश राणे यांच्या पुढाकारातून या भागात विकासकामांना गती मिळाल्याने स्थानिक नागरिकांमध्ये समाधान व्यक्त होत आहे.

कार्यकर्त्यांमध्ये उत्साहाचे वातावरण

“ना. नितेश राणे यांचा वाढदिवस केवळ औपचारिक कार्यक्रमांनी नव्हे तर समाजोपयोगी उपक्रम आणि विकासकामांच्या माध्यमातून साजरा व्हावा, हीच त्यांची कार्यपद्धती आहे. त्यानुसार पडेल मंडळाने विविध लोककल्याणकारी कार्यक्रमांचे आयोजन केले आहे,” अशी भावना स्थानिक कार्यकर्त्यांनी व्यक्त केली.

उपस्थितीचे आवाहन

दि. 23 जून रोजी आयोजित करण्यात आलेल्या या सर्व कार्यक्रमांना परिसरातील नागरिक, शेतकरी, महिला, युवक आणि भाजप कार्यकर्त्यांनी मोठ्या संख्येने उपस्थित राहावे, असे आवाहन भाजप पडेल मंडळ व संयोजन समितीच्या वतीने करण्यात आले आहे.