जागतिक मराठी साहित्य कला व्यक्ती विकास मंच सदस्य दीपक पटेकर यांची अष्टाक्षरी काव्यरचना

जाता लेकरे चाकरी
होते रिकामी ते घरं
मन सांगीतसे नको
जाऊ सोडूनिया दूर

भाऊ बहीण सगळे
होते नांदत घरात
सुख भरुनी वाहले
घरदार उंबऱ्यात

नातरांच्या गोंधळात
घर वाटे जागे झाले
दिसभर कळशीशी
रहाट बावीचा बोले

पाठ टेकली भिंतीस
भिंत गारवा देतसे
गोठ्यातूंनी काळी गाय
हंबरुनी रडतसे

खोली खोली घरातली
उजेडाची वाट पाही
झरोकाच कौलातूनी
कसा डोकावत राही

सुनी सुनी ती ओसरी
पडवीत स्तब्ध झोका
गोंजारील कोण आता
चुलीवर झोपे बोका

दार धरुनी निरोप
देई म्हातारी आई
बाप अश्रू लपवित
ओझं खांदावर घेई

©[दिपी]✒️
दीपक पटेकर, सावंतवाडी
८४४६७४३१९६