आमदार निलेश राणे यांच्या पुढाकाराने व्यावसायिकांना दिलासा

मालवण :

जिल्ह्यातील प्रसिद्ध निवती लाईटहाऊस आणि म्हातारीची चुळ परिसरातील जलसफर व्यावसायिकांच्या विविध समस्यांवर आमदार निलेश राणे यांच्या पुढाकाराने सकारात्मक तोडगा निघाला आहे. शुक्रवारी सिंधुदुर्ग जिल्हा लाईटहाऊस जलसफर संघर्ष समितीचे पदाधिकारी आणि शेकडो पर्यटन व्यावसायिकांनी आमदार निलेश राणे यांची येथील ‘नीलरत्न’ निवासस्थानी भेट घेतली. या चर्चेदरम्यान आमदारांनी काही तात्कालिक प्रश्न जागीच मार्गी लावून व्यावसायिकांना मोठा दिलासा दिला.

प्रशासनाने **‘इनलँड व्हेसल्स अॅक्ट’**च्या नियमांचा हवाला देत बोटींना ५ नॉटिकल मैलांच्या पुढे जाण्यास मर्यादा घातल्या होत्या. यामुळे पर्यटन जलसफारी ठप्प होऊन हजारो स्थानिक कुटुंबांच्या उपजीविकेवर आणि व्यावसायिकांच्या गुंतवणुकीवर मोठे आर्थिक संकट उभे राहिले होते.

याबाबत संघर्ष समितीने स्पष्ट केले की, ही सफारी खोल समुद्रातील मासेमारी नसून ४५ ते ६० मिनिटांची मर्यादित पर्यटन फेरी आहे. हा व्यवसाय गेल्या अनेक वर्षांपासून सर्व शासकीय नियम, लाईफ जॅकेट आणि सुरक्षेची साधने वापरूनच चालवला जातो.

‘स्पेशल टुरिझम झोन’ची मागणी

आमदार निलेश राणे यांच्याकडे प्रमुख मागण्या करण्यात आल्या. यात आयव्ही अॅक्ट अंतर्गत निवती लाईटहाऊस परिसराला ‘स्पेशल टुरिझम झोन’ म्हणून घोषित करून ५ नॉटिकल मैलांच्या अटीतून शिथिलता मिळावी, कायमस्वरूपी तोडगा निघेपर्यंत जलसफारी पूर्ववत सुरू ठेवण्याची मुभा द्यावी, तसेच महाराष्ट्र सागरी मंडळ आणि पर्यटन विभागामार्फत नोंदणी व परवानगी प्रक्रिया सुलभ केली जावी, अशी मागणी करण्यात आली.

पालकमंत्री तथा बंदरे विकास मंत्री नितेश राणे यांच्यामार्फत बंदर विभागाला योग्य निर्देश देण्यात यावेत, अशीही मागणी यावेळी करण्यात आली.

गणेश चतुर्थीनंतर मुंबईत विशेष बैठक

आमदार निलेश राणे यांनी याप्रसंगी स्थानिक बंदर अधिकाऱ्यांशी तातडीने चर्चा केली. तसेच व्यावसायिकांना आश्वस्त करताना त्यांनी सांगितले की, गणेश चतुर्थीच्या सणानंतर मुंबईत वरिष्ठ बंदर अधिकाऱ्यांच्या उपस्थितीत विशेष बैठक आयोजित केली जाईल. या बैठकीला संघर्ष समितीच्या प्रतिनिधींनाही निमंत्रित करून सर्व तांत्रिक व कायदेशीर प्रश्नांवर कायमस्वरूपी तोडगा काढला जाईल.

आमदार निलेश राणे यांच्या त्वरित आणि सकारात्मक निर्णयामुळे उपस्थित सर्व व्यावसायिकांनी त्यांचे आभार मानले. पर्यटकांची सुरक्षा आणि नियमांचे पालन यापुढेही काटेकोरपणे केले जाईल, अशी ग्वाही यावेळी व्यावसायिकांनी दिली.

या बैठकीला शिवसेना जिल्हाप्रमुख दत्ता सामंत, नगराध्यक्षा ममता वराडकर, संघर्ष समितीचे अध्यक्ष मनोज खोबरेकर, उपाध्यक्ष प्रतिक कुबल, सचिव नागेश सारंग, खजिनदार सतिश टिकम यांच्यासह तारकर्ली, देवबाग, भोगवे, किल्ले निवती, श्रीरामवाडी-कोचरा व वेंगुर्ला परिसरातील लोकप्रतिनिधी, सरपंच आणि शेकडो व्यावसायिक उपस्थित होते.