सांगली, (प्रदीप जोशी, ज्येष्ठ पत्रकार)
सांगली–मिरज–कुपवाड शहर महानगरपालिका कार्यक्षेत्रातील प्रभाग क्रमांक ८ मधील मनपा शाळा क्रमांक ३६, विवेकानंद सोसायटी तसेच मनपा शाळा क्रमांक ३३, विद्यानगर येथे करण्यात येणाऱ्या शाळा सुशोभीकरण व रेनोव्हेशन कामांचे उद्घाटन महापालिका आयुक्त संजीता महापात्र, उपायुक्त विद्या पाटील व सहाय्यक आयुक्त श्वेता सुर्वे यांच्या हस्ते करण्यात आले.
विद्यार्थ्यांना स्वच्छ, सुरक्षित, आकर्षक आणि आनंददायी शैक्षणिक वातावरण उपलब्ध करून देण्याच्या उद्देशाने या दोन्ही शाळांमध्ये आवश्यक सुशोभीकरण व नूतनीकरणाची कामे हाती घेण्यात आली आहेत. या कामांमुळे शाळेचा परिसर अधिक सुंदर, प्रसन्न आणि विद्यार्थ्यांच्या शैक्षणिक विकासासाठी पोषक होण्यास मदत होणार आहे.
या कामांसाठी नगरसेवक विष्णू अण्णासाहेब माने यांच्या विशेष प्रयत्नातून शाळा तसेच अंगणवाडी रेनोव्हेशनची कामे करण्यात येत आहेत. शाळांच्या भौतिक सुविधांमध्ये सुधारणा होऊन विद्यार्थ्यांना अधिक चांगल्या सुविधा उपलब्ध होणार असल्याने शिक्षक, विद्यार्थी व पालकांनी समाधान व्यक्त केले
उद्घाटनानंतर महापालिका आयुक्त संजीता महापात्र यांनी शाळेची पाहणी करून सुरू असलेल्या कामांची माहिती घेतली. शाळेतील उपलब्ध सुविधा तसेच करण्यात येणाऱ्या सुशोभीकरण व नूतनीकरणाच्या कामांची त्यांनी पाहणी केली आणि कामांबाबत समाधान व्यक्त केले.
मनपाच्या शाळांमध्ये विद्यार्थ्यांना दर्जेदार शिक्षणासोबतच चांगल्या भौतिक सुविधा आणि प्रसन्न शैक्षणिक वातावरण उपलब्ध करून देण्याच्या दृष्टीने शाळा सुशोभीकरणाची कामे महत्त्वपूर्ण ठरणार आहेत.
शाळा सुशोभीकरण व रेनोव्हेशनच्या कामांमुळे विद्यार्थ्यांना अधिक स्वच्छ, सुंदर, सुरक्षित आणि प्रसन्न वातावरणात शिक्षण घेता येणार आहे. शाळेच्या परिसरातील भौतिक सुविधांमध्ये सकारात्मक सुधारणा होऊन विद्यार्थ्यांचा शाळेकडे पाहण्याचा दृष्टिकोन अधिक सकारात्मक होण्यास मदत होणार आहे.
मनपा शाळांमध्ये उपलब्ध सुविधांचा दर्जा उंचावणे आणि विद्यार्थ्यांना शिक्षणासाठी अनुकूल वातावरण उपलब्ध करून देणे या दृष्टीने ही कामे महत्त्वाची ठरणार आहेत
