व्हाईस ऑफ मीडियाच्या कॅडर कॅम्पमध्ये सिंधुदुर्ग जिल्हा अव्वल!

खोपोलीतील कोकण विभागीय कॅडर कॅम्पमध्ये प्रथम क्रमांक; दोडामार्गच्या टीमच्या नेतृत्वाखाली पत्रकारांची दमदार कामगिरी

सावंतवाडी प्रतिनिधी :

पत्रकारांच्या ज्ञानाची, अभ्यासाची आणि संघभावनेची कसोटी पाहणाऱ्या व्हाईस ऑफ मीडियाच्या कोकण विभागीय कॅडर कॅम्पमध्ये सिंधुदुर्ग जिल्ह्याने प्रथम क्रमांक पटकावला. विविध विषयांवरील प्रश्नांची अचूक उत्तरे देत जिल्ह्याच्या टीमने आपल्या ज्ञानाची आणि एकजुटीची प्रभावी छाप उमटवली.
खोपोली येथे आयोजित या कॅडर कॅम्पमध्ये पत्रकारितेशी संबंधित विविध विषयांसह सामान्य ज्ञानावर आधारित प्रश्न विचारण्यात आले. या प्रश्नांना अचूक उत्तरे देत सिंधुदुर्गच्या टीमने बाजी मारली. या यशामुळे जिल्ह्यातील पत्रकारांमध्ये उत्साहाचे वातावरण निर्माण झाले आहे.
दोडामार्गच्या टीमचे प्रभावी नेतृत्व
जिल्हाध्यक्ष भूषण सावंत, कार्याध्यक्ष संजय पिळणकर आणि दोडामार्ग तालुकाध्यक्ष आपा राणे यांच्या नेतृत्वाखाली टीमने या कॅम्पमध्ये सहभाग घेतला. डिजिटल विंगचे सिंधुदुर्ग जिल्हाध्यक्ष प्रमोद गवस यांच्यासह गोविंद शिरसाट, शिरीष नाईक, रामचंद्र ठाकूर, प्रथमेश नाईक आणि नारायण नाईक आदी पत्रकार उपस्थित होते. सर्वांनी एकजुटीने सहभाग घेत जिल्ह्याच्या यशात योगदान दिले.
मान्यवरांची उपस्थिती
या कॅडर कॅम्पला व्हाईस ऑफ मीडियाचे महाराष्ट्र प्रदेशाध्यक्ष विजय चौडलिया, पत्रकार अजित चव्हाण, डिजिटल विंगच्या संघटक रश्मी मारवाडी आणि कुमार कडलक उपस्थित होते. पत्रकारांचे संघटनात्मक बळ वाढविणे, ज्ञानवृद्धी करणे आणि वैचारिक देवाणघेवाणीसाठी व्यासपीठ उपलब्ध करून देणे, हा या उपक्रमाचा महत्त्वाचा उद्देश होता.
सिंधुदुर्ग जिल्ह्याने मिळविलेला प्रथम क्रमांक हा पत्रकारांच्या अभ्यासू वृत्तीचा, संघभावनेचा आणि सामूहिक प्रयत्नांचा गौरव ठरला आहे. या यशाबद्दल जिल्ह्यातील पत्रकारांचे सर्व स्तरांतून अभिनंदन होत आहे.