जिल्हाधिकारी कार्यालयात अत्याधुनिक “इलेक्ट्रिकल चार्जिंग स्टेशन” सुरू…

नितेश राणेंच्या हस्ते उद्घाटन; अधिकारी, कर्मचारी, सर्वसामान्यांना होणार फायदा…

सिंधुदुर्गनगरी

पर्यावरण संवर्धन, इंधन बचत आणि आधुनिक तंत्रज्ञानाचा स्वीकार करत सिंधुदुर्ग जिल्हा प्रशासनाने ‘हरित प्रशासन’च्या दिशेने एक मोठे पाऊल टाकले आहे. जिल्हाधिकारी कार्यालय परिसरात नव्याने उभारण्यात आलेल्या अत्याधुनिक इलेक्ट्रिकल वाहन चार्जिंग स्टेशनचे उद्घाटन जिल्ह्याचे पालकमंत्री नितेश राणे यांच्या हस्ते उत्साहात पार पडले. या उद्घाटनानंतर पालकमंत्र्यांच्याच इलेक्ट्रिकल वाहनाचे प्रत्यक्ष चार्जिंग करून या नवीन सुविधेची रीतसर सुरुवात करण्यात आली.

वाढते प्रदूषण आणि इंधनाच्या वाढत्या किमती लक्षात घेता, भविष्यात इलेक्ट्रिकल वाहनांचा वापर वाढवणे ही काळाची गरज बनली आहे. या पार्श्वभूमीवर बोलताना पालकमंत्री राणे यांनी पर्यावरणपूरक विकासाचे महत्त्व अधोरेखित केले. शासनाच्या विविध स्तरांवर हरित ऊर्जा आणि स्वच्छ पर्यावरणाला प्रोत्साहन देण्यासाठी आगामी काळात अशा प्रकारच्या आणखी सोयी-सुविधा निर्माण केल्या जातील, असा विश्वास त्यांनी यावेळी व्यक्त केला.

या महत्त्वपूर्ण उद्घाटन प्रसंगी जिल्हाधिकारी तृप्ती धोडमिसे, निवासी उपजिल्हाधिकारी मच्छिंद्र सुकटे, उपजिल्हाधिकारी प्रतिभा वराळे यांच्यासह विविध शासकीय विभागांचे अधिकारी आणि कर्मचारी मोठ्या संख्येने उपस्थित होते. जिल्हाधिकारी कार्यालयाच्या आवारातच हे चार्जिंग स्टेशन सुरू झाल्यामुळे आता शासकीय अधिकारी, कर्मचारी तसेच विविध कामांसाठी येथे येणाऱ्या सामान्य नागरिकांना आपल्या गाड्या चार्ज करण्यासाठी एक हक्काची आणि सोयीस्कर जागा उपलब्ध झाली आहे. या सुविधेमुळे जिल्ह्यातील इलेक्ट्रिकल वाहनांच्या वापराला नक्कीच मोठी चालना मिळेल आणि पारंपरिक इंधनावरील अवलंबित्व कमी होण्यास मदत होईल.