कुडाळमध्ये ‘सिंधुसरस २०२६’चा जल्लोष; महिला बचत गटांच्या उत्पादनांना मोठा प्रतिसाद

🟡 उपशीर्षक:

७५ स्टॉल्ससह पाच दिवसीय प्रदर्शनाला दमदार सुरुवात; पालकमंत्री नितेश राणेंकडून महिला सक्षमीकरणावर भर

कुडाळ / प्रतिनिधी :

कुडाळ येथील हायस्कूल पटांगणावर ‘सिंधुसरस व मिनी सरस २०२६’ प्रदर्शनाची उत्साहपूर्ण सुरुवात झाली असून जिल्ह्यातील महिला बचत गटांच्या उत्पादनांनी संपूर्ण परिसर गजबजून गेला आहे. ग्रामीण भागातील महिलांच्या उद्योजकतेला चालना देणारा हा उपक्रम ठरत असून नागरिकांकडूनही मोठा प्रतिसाद मिळत आहे.

ग्रामविकास व पंचायत राज विभाग तसेच जिल्हा ग्रामीण विकास यंत्रणा, जिल्हा परिषद सिंधुदुर्ग यांच्या वतीने उमेद महाराष्ट्र राज्य ग्रामीण जीवनोन्नती अभियानांतर्गत या जिल्हास्तरीय प्रदर्शनाचे आयोजन करण्यात आले आहे. २१ ते २५ मार्च २०२६ या कालावधीत सुरू असलेल्या या प्रदर्शनात तब्बल ७५ स्टॉल्स सहभागी झाले आहेत. विविध बचत गटांनी तयार केलेली खाद्यपदार्थ, हस्तकला, घरगुती उत्पादने, पारंपरिक वस्तू आदींची मोठ्या प्रमाणात विक्री होत असून खरेदीसाठी नागरिकांची गर्दी उसळत आहे.

या प्रदर्शनाचे उद्घाटन पालकमंत्री नितेश राणे यांच्या हस्ते पार पडले. उद्घाटनानंतर त्यांनी सर्व स्टॉल्सना भेट देत महिलांनी तयार केलेल्या उत्पादनांची पाहणी केली व त्यांचे कौतुक केले.

यावेळी बोलताना पालकमंत्री नितेश राणे म्हणाले की, सिंधुदुर्ग जिल्ह्यातील महिलांमध्ये प्रचंड क्षमता असून त्या सक्षम झाल्यास जिल्ह्याचे अर्थकारण अधिक मजबूत होऊ शकते. ‘सिंधुसरस’ व ‘मिनी सरस’ सारख्या प्रदर्शनांमुळे महिलांना त्यांच्या उत्पादनांचे प्रदर्शन आणि विक्रीसाठी हक्काचे व्यासपीठ मिळते. यामुळे त्यांचा आत्मविश्वास वाढतो, कौशल्य विकसित होते आणि आर्थिक स्वावलंबनाचा मार्ग खुला होतो. जिल्ह्याचे दरडोई उत्पन्न वाढविण्यासाठी रोजगार व स्वयंरोजगार वाढणे अत्यावश्यक असून बचत गटांनी नियोजनबद्ध पद्धतीने काम करणे गरजेचे आहे, असे त्यांनी सांगितले.

ते पुढे म्हणाले की, आज एका बचत गटात ५ महिला कार्यरत असतील तर पुढील वर्षी ही संख्या १५ पर्यंत वाढली पाहिजे. यासाठी सातत्यपूर्ण प्रयत्न आवश्यक असून जिल्हा परिषदेमार्फत सर्वतोपरी मदत केली जाईल. तसेच पालकमंत्री म्हणून आर्थिक पाठबळ देण्यासाठी आपण कटिबद्ध असल्याचेही त्यांनी स्पष्ट केले. नागरिकांनी या प्रदर्शनाला भेट देऊन महिला बचत गटांच्या उत्पादनांची खरेदी करून त्यांना प्रोत्साहन द्यावे, असे आवाहन त्यांनी केले.

जिल्हा परिषद अध्यक्ष प्रमोद कामत यांनी आपल्या भाषणात ‘सिंधुसरस’ हे केवळ प्रदर्शन नसून महिलांच्या सक्षमीकरणाचा उत्सव असल्याचे सांगितले. महिलांनी चुल आणि मुल या मर्यादित चौकटीतून बाहेर पडून उद्योगक्षेत्रात स्वतःचे स्थान निर्माण केले आहे. नागरिकांनी मोठ्या प्रमाणावर खरेदी करून महिलांना हातभार लावावा, असेही त्यांनी आवाहन केले.

जिल्हाधिकारी तृप्ती धोडमिसे यांनी सांगितले की, अशा प्रदर्शनांमुळे महिला बचत गटांना मोठे व्यासपीठ मिळते व त्यांच्या उत्पादनांना बाजारपेठ उपलब्ध होते. त्यामुळे त्यांच्या आर्थिक प्रगतीला गती मिळते आणि आत्मविश्वासात वाढ होते.

जिल्हा परिषद मुख्य कार्यकारी अधिकारी रविंद्र खेबुडकर यांनी प्रास्ताविकात माहिती देताना सांगितले की, सन २०१६ पासून आतापर्यंत बचत गटांसाठी सुमारे ८५० कोटी रुपयांचे अर्थसहाय्य वितरित करण्यात आले आहे. सिंधुदुर्ग जिल्ह्यातील सुमारे १० हजार बचत गटांमध्ये जवळपास १ लाख महिला सहभागी असून या उपक्रमांमुळे सुमारे १५ कोटी रुपयांचा आर्थिक फायदा झाला आहे. पुढील काळात काही बचत गटांना उद्योग क्षेत्रात आणण्यासाठी विशेष नियोजन करण्यात येणार असल्याचेही त्यांनी नमूद केले.

कार्यक्रमादरम्यान समीर चराटकर यांनी आपल्या सुरेल गायनाने उपस्थितांची मने जिंकली. कार्यक्रमाचे सूत्रसंचालन श्री. गुरव यांनी केले, तर आभार प्रदर्शन उपमुख्य कार्यकारी अधिकारी जयप्रकाश परब यांनी केले.

या कार्यक्रमाला जिल्हा परिषद अध्यक्ष प्रमोद कामत, जिल्हाधिकारी तृप्ती धोडमिसे, मुख्य कार्यकारी अधिकारी रविंद्र खेबुडकर, उपाध्यक्ष तुकाराम उर्फ दादा साईल, पोलिस अधीक्षक डॉ. मोहन दहिकर, माजी आमदार अजित गोगटे, कुडाळ सभापती मिलिंद नाईक, उपसभापती सीताराम तेली, सदस्य दिपक नारकर, दिपलक्ष्मी पडते, नागेश आईर, रुपेश कानडे, अतिरिक्त मुख्य कार्यकारी अधिकारी शितल पुंड, प्रकल्प संचालक उदय पाटील, उपमुख्य कार्यकारी अधिकारी जयप्रकाश परब, कुडाळ गटविकास अधिकारी प्रफुल्ल वालावलकर, मालवण गटविकास अधिकारी श्याम चव्हाण, वेगुर्ला गटविकास अधिकारी व्ही. एम. नाईक यांसह अनेक मान्यवर आणि नागरिक मोठ्या संख्येने उपस्थित होते.