आंबेली येथे पर्यटकांची कार घळणीत कोसळली; सुदैवाने जीवितहानी टळली

दोडामार्ग

दोडामार्ग तालुक्यातील आंबेली परिसरात आज पहाटेच्या सुमारास एक अपघात घडला. विरुद्ध दिशेने गेलेली पर्यटकांची कार थेट रस्त्यालगतच्या घळणीत कोसळली. या अपघातात कारमधील सर्व पर्यटक सुखरूप असून मात्र वाहनाचे मोठ्या प्रमाणात नुकसान झाले आहे.
कर्नाटक राज्यातील काही पर्यटक गोव्याकडे जाण्यासाठी दोडामार्ग मार्गे प्रवास करत होते. दोडामार्ग–वीजघर या राज्य मार्गावर आंबेली येथे चालकाचा अंदाज चुकल्याने कार चुकीच्या दिशेने गेली आणि घळणीत कोसळली. अपघातस्थळी माती असल्यामुळे कार जवळच्या विद्युत खांबावर आदळण्यापासून थोडक्यात बचावली. मात्र रस्त्यालगत लोंबकळणाऱ्या दूरसंचार निगमच्या तारांना कार लागल्याने त्या तुटल्या.
दरम्यान, आंबेली येथे सध्या एका मोरीचे काम सुरू असून संबंधित ठेकेदाराने कोणतेही सूचना फलक किंवा इशारे लावले नसल्याचा आरोप स्थानिक नागरिकांनी केला आहे. योग्य सूचना नसल्याने चालकास रस्त्याची कल्पना न आल्यामुळेच अपघात झाल्याचे त्यांचे म्हणणे आहे. तर काही नागरिकांनी चालकाला डुलकी आल्याने हा अपघात घडला असावा, अशी शक्यता व्यक्त केली आहे.
या घटनेमुळे सार्वजनिक बांधकाम विभाग आणि संबंधित ठेकेदारांच्या सुरक्षितता उपाययोजनांबाबत पुन्हा एकदा प्रश्नचिन्ह उपस्थित झाले आहे.