साळीस्तेतील खून प्रकरण : अज्ञात तरुणाची ओळख पटण्याची शक्यता, पोलिस तपासात गती

कणकवली (प्रतिनिधी) –

कणकवली तालुक्यातील साळीस्ते येथे गुरुवारी दुपारी एका अज्ञात तरुणाचा मृतदेह अत्यंत विद्रुप अवस्थेत आढळून आल्यानंतर परिसरात खळबळ उडाली आहे. या भीषण घटनेनंतर पोलिसांनी तातडीने तपास सुरू केला असून, काही महत्वपूर्ण धागेदोरे हाती लागले आहेत. मिळालेल्या माहितीनुसार, या तरुणाची ओळख आज (शुक्रवारी) पटण्याची शक्यता व्यक्त केली जात आहे.

या प्रकरणाचा तपास पोलीस अधीक्षक मोहन दहिकर आणि उपविभागीय पोलीस अधिकारी घनश्याम आढाव यांच्या मार्गदर्शनाखाली कणकवली पोलिसांनी गतीमान केला आहे. प्राथमिक तपासात मिळालेल्या पुराव्यांवरून हा मृतदेह महाराष्ट्रालगतच्या एका राज्यातील तरुणाचा असल्याचा निष्कर्ष पोलिसांनी काढला आहे. संबंधित राज्यातील पोलिसांशी संपर्क साधून मृताच्या कुटुंबीयांशी संपर्क साधण्यात आला असून ते ओळख पटविण्यासाठी कणकवलीकडे रवाना झाले आहेत.

गुरुवारी सापडलेला मृतदेह अत्यंत विद्रुप अवस्थेत होता. मृताच्या डोक्याचा व छातीचा भाग कुजलेला असून, शरीरावर धारदार शस्त्राचे वार असल्याचे आढळून आले आहे. तसेच ओळख पटू नये म्हणून मारेकऱ्यांनी चेहरा विद्रुप करण्याचा प्रयत्न केल्याचेही प्राथमिक तपासात स्पष्ट झाले आहे.

या घटनेनंतर साळीस्ते परिसरात भीतीचे वातावरण पसरले आहे. मात्र पोलिसांनी तपासाची चक्रे वेगाने फिरवली असून, खुनाचा उलगडा लवकरच होईल, असा विश्वास अधिकाऱ्यांनी व्यक्त केला आहे.

📍 — साळीस्ते, कणकवली