*रोमहर्षक लढतीत राजस्थानने चेन्नईचा तीन धावांनी केला पराभव*

मुंबई (गुरुदत्त वाकदेकर) :

राजस्थान रॉयल्सने चेन्नई सुपर किंग्जचा तीन धावांनी पराभव करत स्पर्धेतील तिसरा विजय नोंदवला. या सामन्यातील विजयासह राजस्थानचा संघ गुणतालिकेत अव्वल स्थानावर आला आहे. प्रथम फलंदाजी करताना राजस्थान रॉयल्सने आठ गडी गमावून १७५ धावा केल्या. प्रत्युत्तरात चेन्नईच्या संघाला सहा गडी गमावून १७२ धावा करता आल्या आणि सामना तीन धावांनी गमवावा लागला. या सामन्यात महेंद्रसिंग धोनी आणि रवींद्र जडेजा या जोडीला संदीप शर्माविरुद्ध शेवटच्या तीन चेंडूत सात धावा काढता आल्या नाहीत.

राजस्थानकडून जोस बटलरने ५२ आणि देवदत्त पडिक्कलने ३८ धावा केल्या. अश्विन आणि हेटमायरने प्रत्येकी ३० धावा केल्या. चेन्नईकडून रवींद्र जडेजा, आकाश सिंग आणि तुषार देशपांडे यांनी प्रत्येकी दोन गडी बाद केले. मोईन अलीला एक विकेट मिळाली. त्याचवेळी चेन्नईकडून डेव्हॉन कॉनवेने ५०, महेंद्रसिंग धोनीने नावाद ३२ आणि अजिंक्य रहाणेने ३१ धावा केल्या. जडेजा २५ धावा करून नाबाद राहिला. राजस्थानकडून अश्विन आणि चहलने प्रत्येकी दोन गडी बाद केले. झाम्पा आणि संदीप शर्मा यांना प्रत्येकी एक विकेट मिळाली.

महेंद्रसिंग धोनीने आयपीएलमधील आपल्या कर्णधारपदाच्या २०० व्या सामन्यात नाणेफेक जिंकून राजस्थानला फलंदाजीसाठी पाचारण केले. तिसऱ्या षटकात तुषार देशपांडेने यशस्वी जैस्वालला (१०) बाद केले. येथून देवदत्त पडिक्कलने पॉवरप्लेमध्ये राजस्थानला ५० धावांच्या पुढे नेण्यासाठी सढळहस्ते योगदान दिले. त्याला मोईन अलीने स्लिपमध्ये जीवदानही दिले. पॉवरप्लेमध्ये राजस्थानने १ बाद ५७ धावा केल्या, धोकादायक जोस बटलरने १७ धावांचे योगदान दिले.

पॉवरप्ले संपताच बटलरने हात मोकळे केले. मोईनच्या षटकात त्याने सलग दोन षटकार मारले, या षटकात १८ धावा आल्या, पण पुढच्या षटकात रवींद्र जडेजाने भेदक गोलंदाजी केली. प्रथम त्याने २६ चेंडूत ३८ धावा करणाऱ्या देवदत्तला बाद केले. जोस बटलर आणि देवदत्त पडिक्कल यांनी दुसऱ्या विकेटसाठी ४१ चेंडूत ७७ धावांची भागीदारी केली. केवळ एका चेंडूनंतर जडेजाने कर्णधार संजू सॅमसनला सर्वोत्तम चेंडूवर त्रिफळाचीत केले.

मोईनने स्लीपमध्ये अश्विनचा झेल घेतला असता तर राजस्थानची अवस्था आणखी बिकट झाली असती. जडेजाने पहिल्या षटकात ११ धावा दिल्या होत्या. शेवटच्या तीन षटकांमध्ये त्याने केवळ १० धावा दिल्या आणि दोन विकेट घेतल्या. अश्विनने मिळालेल्या जीवदानाचा फायदा घेत आयपीएलचा पहिला सामना खेळणाऱ्या आकाश सिंगला सलग दोन षटकार ठोकले. ३०च्या वैयक्तिक धावसंख्येवर आकाशने त्याला मगाला करवी झेलबाद केले.

विकेट्सच्या पडझडीत जोस बटलरला आपला नैसर्गिक खेळ दाखवता आला नाही. मात्र, यादरम्यान त्याने आयपीएलमधील ८५व्या डावात आपल्या तीन हजार धावा पूर्ण केल्या. ख्रिस गेलने त्याच्यापेक्षा कमी डावात ७५ आणि केएल राहुलने ८० डावात तीन हजार धावा केल्या आहेत. त्याने ३३ चेंडूत आयपीएलमधील २३वे अर्धशतकही पूर्ण केले. बटलर ३६ चेंडूत ५२ धावा करून बाद झाला. हेटमायरने शेवटच्या षटकात दोन षटकार मारले, पण चेन्नईने पुनरागमन केले आणि शेवटच्या पाच षटकांत केवळ ४० धावांत चार विकेट घेतल्या. शिमरॉन हेटमायरने ३० धावांची खेळी केली.

१७६ धावांच्या आव्हानाचा पाठलाग करताना चेन्नईची सुरुवात अतिशय खराब झाली. ऋतुराज गायकवाड अवघ्या आठ धावा करून बाद झाला. यानंतर रहाणे आणि कॉनवे यांनी अर्धशतकी भागीदारी करत चेन्नईचा डाव सांभाळला, मात्र रहाणे १९ चेंडूत ३१ धावा करून अश्विनचा बळी ठरला. यावेळी संघाची धावसंख्या ७८ धावा होती. यानंतर अश्विनने शिवम दुबेलाही आठ धावांवर पायचीत केले. अश्विनचा चेंडू लेगस्टंपच्या बाहेर जात होता, पण दुबेने रिव्ह्यू घेतला नाही आणि तो बाद झाला.

मोईन अली सात धावा करून आणि अंबाती रायडू एक धावा करून बाद झाला. राजस्थानच्या फिरकी गोलंदाजांसमोर चेन्नईचे फलंदाज निष्प्रभ ठरले आणि डेव्हन कॉनवेही ३८ चेंडूत ५० धावा करून चहलचा बळी ठरला. १५ षटकांत ११३ धावांवर सहा विकेट गमावून चेन्नईचा संघ संघर्ष करत होता. यानंतर धोनी आणि जडेजाने मिळून डाव सांभाळला. दोघांनी ३० चेंडूत ५९ धावा जोडल्या, पण संदीप शर्माच्या शेवटच्या षटकातील तीन चेंडूत दोघांनाही सात धावा करता आल्या नाहीत आणि चेन्नईला पराभवाचा सामना करावा लागला.

अश्विनने १६व्या षटकात केवळ चार धावा दिल्या आणि चहलनेही पुढच्या षटकात केवळ पाच धावा दिल्या. झांपाच्या १८व्या षटकात धोनीने एक चौकार आणि एक षटकार मारून १४ धावा केल्या. होल्डरच्या १९व्या षटकात जडेजाने दोन षटकार आणि एक चौकार मारून १९ धावा केल्या. आता शेवटच्या षटकात चेन्नईला विजयासाठी २१ धावांची गरज होती. संदीप शर्माने पहिले दोन वाइड आणि पुढच्या तीन चेंडूंवर धोनीने दोन षटकार ठोकले. चेन्नईला विजयासाठी पुढील तीन चेंडूंमध्ये सात धावांची गरज होती, पण धोनी आणि जडेजा या धावा करू शकले नाहीत. चेन्नईचा चार सामन्यांतील हा दुसरा पराभव आहे. त्याचवेळी राजस्थानने चारपैकी तीन सामने जिंकले आहेत.

अश्विनला सामनावीर पुरस्काराने गौरविण्यात आले.