वैभववाडी
मुंबई विद्यापीठाच्या ५५ व्या युवा महोत्सवामध्ये वैभववाडी येथील आनंदीबाई रावराणे कला, वाणिज्य व विज्ञान महाविद्यालयातील प्रथम वर्ष कला शाखेचा विद्यार्थी कु. हर्ष संजय नकाशे याने उल्लेखनीय यश संपादन केले आहे. दिनांक १४ व १५ सप्टेंबर,२०२२ रोजी मुंबई विद्यापीठ विद्यार्थी भवन, चर्चगेट येथे झालेल्या भारतीय शास्त्रीय गायन, सुगम गायन व नाट्यसंगीत गायन या स्पर्धांमध्ये महाविद्यालयाचा विद्यार्थी हर्ष नकाशे याने सहभाग घेतला होता. त्याने भारतीय शास्त्रीय गायन यामध्ये रौप्य पदक, तसेच सुगम गायनामध्ये उत्तेजनार्थ व नाट्यसंगीत गायनामध्ये उत्तेजनार्थ असे उत्तम यश मिळवून महाविद्यालयाचे नाव मुंबई विद्यापीठामध्ये रोशन केले आहे.
त्याच्या या उत्तम यशस्वी कामगिरीचे संस्था पदाधिकारी, प्राचार्य, प्राध्यापक, शिक्षकेतर कर्मचारी, सर्व विद्यार्थी व पालकांकडून अभिनंदन होत आहे. यापूर्वी मुंबई विद्यापीठांतर्गत संत राऊळ महाराज महाविद्यालय कुडाळ, सिंधुदुर्ग येथे दि. २४ ऑगस्ट,२०२२ रोजी झालेल्या विभागीय युवा महोत्सवामध्ये हर्ष नकाशे याने भारतीय शास्त्रीय गायन, सुगम गायन व नाट्यसंगीत गायन या तिन्ही कला प्रकारांमध्ये प्रथम क्रमांक मिळवून मुंबई विद्यापीठामध्ये होणाऱ्या स्पर्धांसाठी त्याची निवड झाली होती. त्याच्या या उत्तुंग यशासाठी महाविद्यालयामधील सांस्कृतिक विभाग व महाविद्यालयाचे प्राचार्य डॉ. सी. एस. काकडे यांनी विशेष प्रयत्न केले.
