कणकवलीत ३ ते ७ नोव्हेंबरदरम्यान भाजपचा दिवाळी बाजार

पालकमंत्री नितेश राणे यांच्या हस्ते उद्घाटन; महिला बचत गटांसाठी २५, कुंभार समाजासाठी १० स्टॉल मोफत

कणकवली :

महिला बचत गट, गृहउद्योग आणि स्थानिक लघुउद्योजकांनी तयार केलेल्या उत्पादनांना हक्काची बाजारपेठ उपलब्ध करून देण्यासाठी कणकवली शहर भारतीय जनता पक्षाच्या वतीने यंदाही दिवाळी बाजाराचे आयोजन करण्यात आले आहे. या उपक्रमाचे हे सलग आठवे वर्ष असून, ३ ते ७ नोव्हेंबर या कालावधीत आप्पासाहेब पटवर्धन चौक येथे हा बाजार भरणार आहे. पालकमंत्री नितेश राणे यांच्या हस्ते या दिवाळी बाजाराचे उद्घाटन होणार असल्याची माहिती नगरसेविका मेघा गांगण यांनी पत्रकार परिषदेत दिली.
समीर नलावडे मित्रमंडळ कार्यालयात आयोजित पत्रकार परिषदेला नगरसेविका मेघा गांगण, प्रतीक्षा सावंत, आर्या राणे, मनस्वी ठाणेकर, स्वप्नील राणे, संजय कामतेकर, बंडू हर्णे, भाजप शहराध्यक्ष अण्णा कोदे, प्राची कर्पे, प्रियाली कोदे आणि साक्षी वाळके आदी उपस्थित होते.
स्थानिक उत्पादकांना मिळणार थेट विक्रीची संधी
महिला बचत गट आणि गृहउद्योगातील अनेक महिला घरगुती दिवाळी फराळ, खाद्यपदार्थ, सजावटीच्या वस्तू आणि हस्तकलेच्या वस्तू तयार करतात. मात्र, या उत्पादनांच्या विक्रीसाठी योग्य बाजारपेठ उपलब्ध होत नसल्याने त्यांना अडचणींचा सामना करावा लागतो. ही गरज लक्षात घेऊन भाजपच्या माध्यमातून गेल्या आठ वर्षांपासून दिवाळी बाजार भरविण्यात येत आहे. स्थानिक उत्पादकांना ग्राहकांपर्यंत थेट पोहोचता यावे आणि त्यांच्या व्यवसायाला चालना मिळावी, हा या उपक्रमाचा मुख्य उद्देश असल्याचे मेघा गांगण यांनी सांगितले.
दिवाळी खरेदीसाठी विविध वस्तू एकाच ठिकाणी
या बाजारात घरगुती दिवाळी फराळ, विविध खाद्यपदार्थ, रांगोळी, मेहंदी, दिवाळी सजावटीच्या वस्तू तसेच कुंभार समाजातील कारागिरांनी तयार केलेल्या पणत्या आणि मातीच्या वस्तूंचे स्टॉल असणार आहेत. त्यामुळे नागरिकांना दिवाळीच्या खरेदीसाठी विविध वस्तू एकाच ठिकाणी उपलब्ध होणार असून, स्थानिक उत्पादकांकडून थेट खरेदी करण्याची संधी मिळणार आहे.
स्टॉलधारकांना टेबल, खुर्च्या आणि वीज मोफत
या उपक्रमात सहभागी होणाऱ्या स्टॉलधारकांना भाजपच्या वतीने मोफत सुविधा देण्यात येणार आहेत. प्रत्येक स्टॉलसाठी एक टेबल, दोन खुर्च्या आणि विजेची व्यवस्था उपलब्ध करून दिली जाणार आहे. महिला बचत गटांसाठी २५, तर कुंभार समाजासाठी १० स्टॉल उपलब्ध करून देण्यात येणार असल्याची माहिती शहराध्यक्ष अण्णा कोदे यांनी दिली.
नोंदणीसाठी संपर्क साधण्याचे आवाहन
दिवाळी बाजारात स्टॉल लावू इच्छिणाऱ्या महिला बचत गट, गृहउद्योग चालक आणि स्थानिक उत्पादकांनी शहराध्यक्ष अण्णा कोदे (९४२२३८१९००) किंवा नगरसेविका मेघा गांगण (०९४०४४४८९९९) यांच्याशी संपर्क साधून नोंदणी करावी, असे आवाहन करण्यात आले आहे.
कणकवली शहरासह तालुक्यातील महिला बचत गट, गृहउद्योग चालक आणि स्थानिक उत्पादकांनी या उपक्रमात मोठ्या संख्येने सहभागी व्हावे. तसेच नागरिकांनी स्थानिक महिलांनी व कारागिरांनी तयार केलेल्या वस्तूंची खरेदी करून त्यांच्या व्यवसायाला प्रोत्साहन द्यावे, असे आवाहन मेघा गांगण यांनी केले. स्थानिक उत्पादनांना बाजारपेठ उपलब्ध करून देतानाच दिवाळीच्या खरेदीतून स्थानिक अर्थव्यवस्थेला चालना देणारा हा उपक्रम ठरणार आहे.