राजकीय स्पर्धेपेक्षा विकासकामांची स्पर्धा झाली पाहिजे : शंकर घारे

कोचरा येथे विविध विकासकामांचे लोकार्पण व भूमिपूजन; सरपंच योगेश तेली यांच्या कार्याचे मान्यवरांकडून कौतुक

वेंगुर्ला

“राजकीय स्पर्धेपेक्षा गावाच्या विकासाची स्पर्धा झाली पाहिजे. कोचरा गावाला सेवाभावी आणि समर्पित वृत्तीने काम करणारा सरपंच योगेश तेली यांच्या रूपाने लाभला आहे. त्यामुळे गावातील नागरिक समाधानी आहेत,” असे प्रतिपादन वेंगुर्ला पंचायत समितीचे सभापती शंकर घारे यांनी केले.
कोचरा येथे जिल्हा वार्षिक योजना, आमदार स्थानिक विकास निधी आणि ग्रामविकास विभागाच्या २५/१५ योजनेअंतर्गत मंजूर झालेल्या विविध विकासकामांच्या लोकार्पण व भूमिपूजन सोहळ्यात ते बोलत होते.
सुमारे १० लाखांच्या रस्ता काँक्रीटीकरणाचे भूमिपूजन
या वेळी कोचरा-म्हापण मुख्य रस्ता ते श्री वाघोबा मंदिर रस्ता काँक्रीटीकरणाच्या सुमारे १० लाख रुपये खर्चाच्या कामाचे भूमिपूजन करण्यात आले. यासोबतच कोचरा परिसरातील पर्यटनस्थळे व वॉटर स्पोर्ट्सची माहिती देणाऱ्या फलकांचे अनावरण करण्यात आले.
तसेच ग्रामपंचायत इमारतीचे सुशोभीकरण आणि नूतन सुसज्ज व्यायामशाळेचे लोकार्पण मान्यवरांच्या हस्ते करण्यात आले.
योगेश तेली यांच्या कार्याचे कौतुक
शिवसेना जिल्हा समन्वयक सचिन वालावलकर यांनी सरपंच योगेश तेली यांचा लोकसंपर्क आणि कार्यपद्धती कौतुकास्पद असल्याचे सांगितले. जिल्हा परिषद सदस्या यज्ञा साळगावकर यांनी योगेश तेली व वरिष्ठ पदाधिकाऱ्यांच्या मार्गदर्शनामुळे मतदारसंघातील विविध विकासकामे मार्गी लागत असल्याचे नमूद केले.
उपसभापती सचिन देसाई यांनी गावात विकासकामे खेचून आणण्यासाठी सक्षम नेतृत्वाची गरज असते आणि त्याचे उत्तम उदाहरण म्हणजे योगेश तेली असल्याचे सांगत त्यांच्या कार्याचा गौरव केला.
“गावाचा सर्वांगीण विकास हाच केंद्रबिंदू”
सरपंच योगेश तेली यांनी ग्रामस्थांच्या सहकार्याबद्दल आभार मानले. ग्रामपंचायतीच्या माध्यमातून काम करताना वैयक्तिक हितापेक्षा गावाचा सर्वांगीण विकास हाच केंद्रबिंदू ठेवला आहे. स्वार्थापेक्षा गावाचा विकास हाच आपला मुख्य उद्देश असल्याचे त्यांनी स्पष्ट केले.
मान्यवरांचा सत्कार
कार्यक्रमाच्या निमित्ताने उपस्थित मान्यवरांचा शाल, श्रीफळ, पुष्पगुच्छ आणि श्री स्वामी समर्थ यांची प्रतिमा देऊन सत्कार करण्यात आला.
या कार्यक्रमाला सभापती शंकर घारे, उपसभापती सचिन देसाई, जिल्हा परिषद सदस्या यज्ञा साळगावकर, शिवसेना जिल्हा समन्वयक सचिन वालावलकर, पंचायत समिती सदस्य विष्णू फणसेकर, सरपंच योगेश तेली, तालुकाप्रमुख बाळा दळवी, युवासेना जिल्हाप्रमुख हर्षद डेरे, विभागप्रमुख मितेश परब, उपसरपंच गुरुनाथ शिरोडकर यांच्यासह विविध पदाधिकारी, ग्रामपंचायत सदस्य, अधिकारी आणि ग्रामस्थ मोठ्या संख्येने उपस्थित होते.