*जागतिक साहित्य कला व्यक्तित्व विकास मंच तथा लालीत्य नक्षत्रवेल समूहाच्या सन्माननीय सदस्य कवयित्री सौ आदिती धोंडी मसुरकर लिखित अप्रतिम काव्यरचना*

*टपटपच्या तालात गाणी गाऊया..*

रिमझिमत्या सरीत खेळ खेळुया

टपटपच्या तालात गाणी गाऊया ॥ धृ ॥

कोसळत्या जलधारा पाहू डोळ्यांनी

चमचमत्या गारांना झेलू हातांनी

माळरानी चिखलात खूप नाचूया

टपटपच्या तालात गाणी गाऊया ॥१ ॥

पावसाच्या तुषारांनी भिजले अंग

क्षणातच सृष्टीचाही बदले रंग

हिरवेगार रुपडे मनी जपुया

टपटपच्या तालात गाणी गाऊया ॥२ ॥

भेगाळल्या धरणीची शमली आस

तापलेल्या मातीलाही सुटला वास

झाडे वेली फुलांसंगे मुक्त डोलुया

टपटपच्या तालात गाणी गाऊया ॥ ३ ॥

*✒️© सौ. आदिती धोंडी मसुरकर*

*कुडाळ सिंधुदुर्ग*