आयुक्त संजीता महापात्रा यांच्या संकल्पनेतून उपक्रम; ८९ जणांची शारीरिक तपासणी, ७२ जणांची रक्त तपासणी

सांगली / प्रदीप जोशी, ज्येष्ठ पत्रकार :

सांगली–मिरज–कुपवाड शहर महानगरपालिकेच्या मुख्यालयात आरोग्य विभागामार्फत महानगरपालिकेतील अधिकारी व कर्मचाऱ्यांसाठी शारीरिक आरोग्य तपासणी व रक्त तपासणी शिबिराचे आयोजन करण्यात आले. आयुक्त संजीता महापात्रा यांच्या संकल्पनेतून आयोजित या शिबिराला अधिकारी व कर्मचाऱ्यांचा उत्स्फूर्त प्रतिसाद मिळाला.

८९ जणांची शारीरिक तपासणी; ७२ जणांची रक्त तपासणी

या शिबिरामध्ये एकूण ८९ अधिकारी व कर्मचाऱ्यांची शारीरिक आरोग्य तपासणी, तर ७२ अधिकारी व कर्मचाऱ्यांची रक्त तपासणी करण्यात आली. रक्त तपासणीअंतर्गत ब्लड शुगर, लिपिड प्रोफाइल, किडनी फंक्शन टेस्ट यांसह विविध महत्त्वाच्या तपासण्या करण्यात आल्या.

या तपासण्यांमुळे सहभागी अधिकारी व कर्मचाऱ्यांना त्यांच्या आरोग्यस्थितीबाबत प्राथमिक माहिती मिळण्यास मदत झाली. आयुक्त, उपायुक्त तसेच महानगरपालिकेतील इतर अधिकारी व कर्मचाऱ्यांनीही या शिबिरात सहभागी होऊन आरोग्य तपासणीचा लाभ घेतला.

निरोगी कर्मचारीवर्गासाठी आरोग्य जागरूकतेवर भर

अधिकारी व कर्मचाऱ्यांमध्ये आरोग्य विषयक जागरूकता निर्माण करणे, नियमित आरोग्य तपासणीचे महत्त्व अधोरेखित करणे आणि संभाव्य आरोग्यविषयक समस्यांचे वेळीच निदान होण्यास मदत करणे, हा या शिबिराचा प्रमुख उद्देश होता.

दैनंदिन कामकाजाच्या व्यस्ततेत स्वतःच्या आरोग्याकडे लक्ष देणे आवश्यक असून, नियमित आरोग्य तपासणीमुळे आरोग्यस्थितीची माहिती मिळण्यास मदत होते. या दृष्टिकोनातून आयोजित करण्यात आलेल्या शिबिरामुळे अधिकारी व कर्मचाऱ्यांमध्ये आरोग्याबाबत जागरूकता वाढविण्यास हातभार लागला.

सदर शिबिर यशस्वीरीत्या पार पाडण्यासाठी महानगरपालिकेच्या आरोग्य विभागामार्फत आवश्यक नियोजन व समन्वय साधण्यात आला.