साळीस्ते येथे भीषण अपघात; कंटेनरला दुचाकीची मागून धडक, दुचाकीस्वाराचा मृत्यू

मुंबई–गोवा महामार्गावरील दुर्घटना; जखमीला रुग्णालयात नेले, मात्र उपचारापूर्वीच मृत घोषित

कणकवली

मुंबई–गोवा महामार्गावरील साळीस्ते येथे बुधवारी दुपारी सुमारे १२ वाजण्याच्या सुमारास झालेल्या भीषण अपघातात एका दुचाकीस्वाराचा मृत्यू झाला. मुंबईच्या दिशेने जाणाऱ्या HR 61 D 1261 क्रमांकाच्या कंटेनरला मागून TVS रायडर दुचाकीने जोरदार धडक दिल्याने हा अपघात घडला.
धडक इतकी भीषण होती की दुचाकीस्वाराच्या डोक्याला गंभीर दुखापत होऊन मोठ्या प्रमाणात रक्तस्राव झाला. अपघाताची माहिती मिळताच तळेरे बाजारपेठ मित्रमंडळाच्या रुग्णवाहिकेद्वारे जखमीला तातडीने कणकवली उपजिल्हा रुग्णालयात दाखल करण्यात आले. मात्र, वैद्यकीय अधिकाऱ्यांनी तपासणीनंतर त्याला मृत घोषित केले.
अपघातग्रस्त दुचाकी ही TVS कंपनीची रायडर असल्याची माहिती असून, मृत दुचाकीस्वाराची ओळख वृत्त लिहिपर्यंत पटलेली नव्हती. या प्रकरणाची नोंद संबंधित पोलीस ठाण्यात करण्यात आली असून, अपघाताचे नेमके कारण शोधण्यासाठी पोलीस अधिक तपास करत आहेत.