घारपी शाळेत EVM वर रंगला लोकशाहीचा उत्सव; चिमुकल्यांनी निवडले आपले शालेय मंत्रिमंडळ

*उद्याचे सजग मतदार घडविण्याचा अभिनव उपक्रम; विद्यार्थ्यांनी प्रत्यक्ष अनुभवली लोकशाहीची मतदान प्रक्रिया*

*बांदा*

लोकशाही ही केवळ शासनव्यवस्था नसून जबाबदारी, समानता, पारदर्शकता आणि योग्य नेतृत्वाची निवड करण्याची जीवनशैली आहे. ही लोकशाही मूल्ये विद्यार्थ्यांच्या मनात बालवयापासून दृढपणे रुजावीत, या उदात्त हेतूने सावंतवाडी तालुक्यातील सह्याद्रीच्या डोंगर कुशीत वसलेल्या जिल्हा परिषद प्राथमिक शाळा घारपी येथे शालेय मंत्रिमंडळाची निवडणूक इलेक्ट्रॉनिक मतदान यंत्र (EVM) द्वारे प्रत्यक्ष निवडणुकीच्या धर्तीवर अत्यंत शिस्तबद्ध, पारदर्शक आणि उत्साहपूर्ण वातावरणात पार पडली.

निवडणुकीपूर्वी उमेदवारांनी आपला प्रचार केला, विद्यार्थ्यांशी संवाद साधला आणि शाळेच्या विकासासाठी आपल्या संकल्पना मांडल्या. मतदानाचे महत्त्व, मतदाराची जबाबदारी, गुप्त मतदानाची संकल्पना, लोकशाहीतील प्रत्येक मताचे मूल्य तसेच EVM चा वापर याविषयी विद्यार्थ्यांना सविस्तर मार्गदर्शन करण्यात आले. त्यामुळे संपूर्ण शाळा लोकशाहीच्या रंगात रंगून गेली.
मतदानाच्या दिवशी शाळेचे रूप एखाद्या खऱ्या मतदान केंद्राप्रमाणे भासत होते. शिस्तबद्ध रांगेत उभे राहून प्रत्येक विद्यार्थ्याने EVM वरील पसंतीच्या उमेदवारासमोरील बटण दाबत आपल्या मतदानाचा हक्क बजावला. EVM मधून उमटणारा प्रत्येक ‘बीप’ हा केवळ एका मताची नोंद नव्हता, तर लोकशाहीवरील विश्वास, जबाबदार नागरिकत्व आणि उज्ज्वल भविष्यासाठीच्या संकल्पाचा निनाद होता. मतदान करताना विद्यार्थ्यांच्या चेहऱ्यावर झळकणारा उत्साह, आनंद आणि अभिमान हा प्रत्येक उपस्थिताच्या मनाला स्पर्शून गेला.
त्यानंतर EVM द्वारे पारदर्शक पद्धतीने मतमोजणी करण्यात आली. निकाल जाहीर होताच विजयी उमेदवारांचे ढोल व टाळ्यांच्या कडकडाटात स्वागत करण्यात आले, तर इतर उमेदवारांनीही मोठ्या मनाने निकाल स्वीकारत लोकशाहीतील विजयाइतकाच पराभवाचाही सन्मान असतो, हा आदर्श घालून दिला.
निवडणूक प्रक्रिया अत्यंत शिस्तबद्ध, पारदर्शक आणि यशस्वीरीत्या पार पाडण्यासाठी केंद्राध्यक्ष म्हणून मुख्याध्यापक जे. डी. पाटील यांनी संपूर्ण नियोजन, मार्गदर्शन आणि देखरेखीची जबाबदारी समर्थपणे सांभाळली. तर मतदान अधिकारी म्हणून सहकारी शिक्षक आशिष तांदुळे आणि धर्मराज खंडागळे यांनी मतदार पडताळणी, EVM द्वारे मतदान, मतमोजणी तसेच संपूर्ण निवडणूक प्रक्रिया अत्यंत जबाबदारीने आणि काटेकोरपणे पार पाडली. त्यांच्या नियोजनबद्ध कार्यामुळे संपूर्ण निवडणूक कोणत्याही अडथळ्याविना यशस्वीरित्या पूर्ण झाली.
या अभिनव उपक्रमामुळे विद्यार्थ्यांनी लोकशाहीची तत्त्वे केवळ पुस्तकांतून नव्हे, तर प्रत्यक्ष कृतीतून अनुभवली. मतदानाचा हक्क, योग्य नेतृत्वाची निवड, नियमांचे पालन, पारदर्शकता आणि निकालाचा सन्मान ही लोकशाहीची मूलभूत मूल्ये विद्यार्थ्यांच्या मनात अधिक दृढ झाली.
आज EVM चे बटण दाबणारी ही चिमुकली बोटेच उद्या भारताच्या लोकशाहीचा पाया अधिक भक्कम करणारी सजग, सुजाण आणि जबाबदार मतदार ठरणार आहेत. लोकशाहीचे संस्कार कृतीतून देणारा घारपी शाळेचा हा अभिनव उपक्रम शिक्षण क्षेत्रासाठी प्रेरणादायी ठरला आहे.