चेक बाऊन्स प्रकरणांच्या तडजोडीने निपटाऱ्यासाठी  18 जुलै रोजी विशेष लोकअदालतीचे आयोजन

सिंधुदुर्गनगरी

निगोशिएबल इन्स्ट्रुमेंट्स अॅक्ट, १८८१ च्या कलम १३८ अंतर्गत दाखल असलेल्या धनादेश अनादर (चेक बाऊन्स) प्रकरणांचा जलद व सामंजस्यपूर्ण निपटारा करण्यासाठी राष्ट्रीय विधी सेवा प्राधिकारण, नवी दिल्ली आणि महाराष्ट्र राज्य विधी सेवा प्राधिकरण, मुंबई यांच्या निर्देशानुसार जिल्हा विधी सेवा प्राधिकरणाचे अध्यक्ष तथा प्रमुख जिल्हा व सत्र न्यायाधीश सुधीर देशपांडे यांच्या मार्गदर्शनाखाली शनिवार, दि. १८ जुलै २०२६ रोजी जिल्हा न्यायालय सिंधुदुर्ग तसेच जिल्ह्यातील सर्व तालुका न्यायालयांमध्ये लोकअदालती आयोजन करण्यात आले असल्याची माहिती जिल्हा विधी सेवा प्राधिकरणाचे सचिव श्री. देशिंगकर यांनी प्रसिध्दपत्रकारद्वारे दिली.

            व्यावसायिक व्यवहार, कर्ज व्यवहार आणि इतर आर्थिक देवाणघेवाणीतून निर्माण झालेल्या चेक बाऊन्स प्रकरणांची संख्या न्यायालयांमध्ये मोठ्या प्रमाणावर प्रलंबित आहे. अशा प्रकरणांमध्ये तडजोडीस भरपूर वाव असल्यामुळे लोकअदालतीच्या माध्यमातून दोन्ही पक्षांना मान्य होईल असा तोडगा काढण्याची संधी उपलब्ध होणार असून दीर्घकालीन न्यायालयीन प्रक्रियेपासून दिलासा मिळतो.

            धनादेश अनादर प्रकरणांमध्ये परस्पर संवाद व समन्वयाद्वारे समाधानकारक तोडगा काढणे शक्य असल्याने संबंधित पक्षकारांनी या विशेष लोकअदालतीचा लाभ घ्यावा, असे आवाहन जिल्हा विधी सेवा प्राधिकरणाचे सचिव ए. जी. देशिंगकर यांनी केले आहे.