*जागतिक साहित्य कला व्यक्तित्व विकास मंचच्या सन्मा सदस्या ज्येष्ठ लेखिका कवयित्री अरुणा मुल्हेरकर लिखित अप्रतिम काव्यरचना*

*तृष्णा* (चरणपूर्ती)

बाल्य गेले यौवन सरले जरा प्राप्त झाली

मायेच्या जंजाळी मी तर पुरता अडकलो

किती धावलो मृगजळाच्यापाठी मी हा असा

*तृष्णा नाही जीर्ण जाहली जीर्ण जरी जाहलो*

काय कल्पना असे सुखाची मज नाही कळले

घरात हसरे तारे असता नाही विसावलो

अमृताचे घट भरलेले दुर्लक्षित राहिले

*तृष्णा नाही जीर्ण जाहली जीर्ण जरी जाहलो*

कधी न केला नामजप मी एकाग्र मनाने

क्षणभर नाही देवापाशी ध्यानस्थ बसलो

लोभ मोह या रिपुंनी केले राज्य मजवरी

*तृष्णा नाही जीर्ण जाहली जीर्ण जरी जाहलो*

होतो वाचत संतोपदेशा गीता गाथेतुनी

पालथ्या घागरीवरी पाणी सदा भरकटलो

हाती न आले काही माझ्या धाव धाव धावलो

*तृष्णा नाही जीर्ण जाहली जीर्ण जरी जाहलो*

आयुष्याचे दिन हे गेले भजनाविण सारे

चंचल चित्ता सावरताना सत्यासी मुकलो

कैसे तुटती मोहपाश हे कसे मुक्त व्हावे

*तृष्णा नाही जीर्ण जाहली जीर्ण जरी जाहलो*

*अरुणा मुल्हेरकर*

*मिशिगन*