पालकमंत्री नितेश राणेंच्या नेतृत्वाखाली महायुतीचा निर्विवाद विजय

कणकवली / नांदगाव :

नांदगाव पंचायत समिती सदस्यपदासाठी भारतीय जनता पक्षाच्या उमेदवार हर्षदा वाळके यांची बिनविरोध निवड निश्चित झाली आहे. त्यांच्या विरोधात ठाकरे शिवसेनेच्या उमेदवार धनश्री मेस्त्री तसेच अपक्ष उमेदवार प्राची निरज मोरये यांनी आपले उमेदवारी अर्ज माघारी घेतल्याने ही निवड निर्विवाद ठरली आहे.

निवडणूक प्रक्रियेच्या अंतिम दिवशी घडलेल्या या राजकीय घडामोडींमुळे नांदगाव पंचायत समिती मतदारसंघात भाजपाचा विजय शिक्कामोर्तब झाला आहे. सर्व कायदेशीर व रीतसर प्रक्रिया पूर्ण झाल्यानंतर हर्षदा वाळके यांची बिनविरोध निवड अधिकृतरीत्या जाहीर करण्यात येणार आहे.

पालकमंत्री नितेश राणे यांच्या नेतृत्वाखाली महायुतीने विरोधकांना जोरदार राजकीय धक्का दिला असून, या बिनविरोध यशामुळे नांदगाव तालुक्यात भाजपाची संघटनात्मक ताकद अधिक मजबूत झाली आहे. आगामी काळात तालुक्यात विकासकामांना गती मिळेल, अशी अपेक्षा यावेळी व्यक्त करण्यात येत आहे.