*चेन्नईची विजयी हॅट्ट्रिक; कोलकातावर ४९ धावांनी मात*

मुंबई (गुरुदत्त वाकदेकर) :

आयपीएल २०२३ च्या ३३ व्या सामन्यात चेन्नई सुपर किंग्जने कोलकाता नाईट रायडर्सचा ४९ धावांनी पराभव केला. नाणेफेक गमावल्यानंतर प्रथम फलंदाजी करताना चेन्नईने २० षटकांत ४ गडी गमावून २३५ धावा केल्या. अजिंक्य रहाणेने २९ चेंडूत ७१ धावांची नाबाद खेळी केली. याशिवाय शिवम दुबेने २१ चेंडूत ५० धावा आणि डेव्हन कॉनवेने ४० चेंडूत ५६ धावा केल्या. प्रत्युत्तरात कोलकाता संघाला २० षटकांत ८ गडी गमावून १८६ धावा करता आल्या. जेसन रॉयने २६ चेंडूत सर्वाधिक ६१ धावा केल्या. त्याचवेळी रिंकू सिंगने ३३ चेंडूत ५३ धावांची नाबाद खेळी केली.

सीएसकेचा या मोसमातील हा सलग तिसरा विजय ठरला. यासह चेन्नई सुपर किंग्जचा संघ गुणतक्त्यात अव्वल स्थानावर पोहोचला आहे. त्यांचे सात सामन्यांतून पाच विजय आणि दोन पराभवांसह १० गुण आहेत. त्याचबरोबर कोलकाता संघाचे सात सामन्यांत दोन विजय आणि पाच पराभवांसह चार गुण आहेत. गुणतक्त्यात संघ आठव्या स्थानावर आहे.

प्रथम फलंदाजी करताना चेन्नईने २० षटकांत ४ गडी गमावून २३५ धावा केल्या. या मोसमातील ही सर्वात मोठी धावसंख्या होती. तत्पूर्वी, सनरायझर्स हैदराबादने केकेआरविरुद्ध ईडन गार्डन्सवरच २२८ धावा केल्या होत्या. आयपीएलमधील चेन्नईची ही तिसरी सर्वोच्च धावसंख्या आहे. यापूर्वी चेन्नईने २०१० मध्ये राजस्थानविरुद्ध २४६ आणि २००८ मध्ये पंजाबविरुद्ध २४० धावा केल्या होत्या. आयपीएलमध्ये सर्वाधिक धावा करण्याचा विक्रम रॉयल चॅलेंजर्स बंगळुरूच्या नावावर आहे. त्याने २०१३ मध्ये बेंगळुरू येथे पुणे वॉरियर्सविरुद्ध २६३ धावा केल्या होत्या.

प्रथम फलंदाजी करणाऱ्या चेन्नईची सुरुवात शानदार झाली. ऋतुराज गायकवाड आणि डेव्हॉन कॉनवे यांनी पहिल्या विकेटसाठी ७३ धावांची भागीदारी केली. सुयश शर्माने ऋतुराजला त्रिफळाचीत केले. त्याला २० चेंडूंत दोन चौकार आणि तीन षटकारांच्या मदतीने ३५ धावा करता आल्या. यानंतर वरुण चक्रवर्तीने कॉनवेला बाद केले. बाद होण्यापूर्वी त्याने या मोसमातील सलग चौथे अर्धशतक आणि आयपीएल कारकिर्दीतील सातवे अर्धशतक झळकावले. कॉनवे ४० चेंडूत चार चौकार आणि तीन षटकारांच्या मदतीने ५६ धावा काढून बाद झाला.

यानंतर अजिंक्य रहाणे आणि शिवम दुबेचे तुफान इडन गार्डन्सवर पाहायला मिळाले. दोघांनी ३४ चेंडूत ८५ धावांची भागीदारी केली. रहाणेने आयपीएल कारकिर्दीतील ३०वे अर्धशतक २४ चेंडूत पूर्ण केले आणि या मोसमातील त्याचे दुसरे अर्धशतक आहे. त्याचवेळी शिवम दुबेने २० चेंडूत अर्धशतक झळकावले. त्याचे आयपीएल कारकिर्दीतील हे पाचवे अर्धशतक होते. मात्र, शिवम अर्धशतक झळकावून बाद झाला. त्याला जेसन रॉयच्या हाती कुलवंत खेजरोलियाने झेल देण्यास भाग पाडले. शिवमने २१ चेंडूंत दोन चौकार आणि पाच षटकारांच्या मदतीने ५० धावांची खेळी केली. रवींद्र जडेजा आठ चेंडूंत दोन षटकारांच्या मदतीने १८ धावा करून बाद झाला. रहाणेने २९ चेंडूंत सहा चौकार आणि पाच षटकारांच्या मदतीने नाबाद ७१ धावांची खेळी केली. यादरम्यान त्याचा स्ट्राइक रेट २४४.८३ होता. त्याचवेळी एमएस धोनी तीन चेंडूत दोन धावा करून नाबाद राहिला. कोलकाताकडून कुलवंतने दोन विकेट घेतल्या. वरुण चक्रवर्ती आणि सुयश शर्मा यांना प्रत्येकी एक विकेट मिळाली.

२३६ धावांच्या लक्ष्याचा पाठलाग करताना कोलकाता संघाची सुरुवात खराब झाली. संघाने एका धावेवर दोन विकेट गमावल्या होत्या. सुनील नरेन खाते न उघडताच बाद झाला. त्याचवेळी एन जगदीशन एक धाव काढून बाद झाला. यानंतर व्यंकटेश अय्यरही काही खास करू शकला नाही आणि २० चेंडूत २० धावा करून बाद झाला. कर्णधार नितीश राणा आणि जेसन रॉय यांनी कोलकाताचा डाव सांभाळण्याचा प्रयत्न केला. दोघांनी चौथ्या विकेटसाठी २४ धावांची भागीदारी केली. धावगती वाढवण्याच्या प्रयत्नात नितीशची विकेट गेली. त्याने २० चेंडूत चार चौकार आणि एका षटकाराच्या मदतीने २७ धावांची खेळी केली.

यानंतर जेसन रॉयचे तुफान इडन गार्डन्समध्ये पाहायला मिळाले. त्याने १९ चेंडूत अर्धशतक झळकावले. मात्र, त्याने अर्धशतक केल्यानंतर विकेट गमावली. रॉयने २६ चेंडूंत पाच चौकार आणि पाच षटकारांच्या मदतीने ६१ धावांची खेळी केली. त्याने रिंकू सिंगसोबत पाचव्या विकेटसाठी ६५ धावांची भागीदारी केली. यानंतर तळाचे फलंदाज फार काही करू शकले नाहीत. आंद्रे रसेल सहा चेंडूत नऊ धावा, डेव्हिड वेस एक धाव, उमेश यादव चार धावा करून बाद झाला. रिंकू सिंगने ३३ चेंडूंत तीन चौकार आणि चार षटकारांच्या मदतीने ५३ धावा केल्यानंतर नाबाद राहिला. चेन्नईकडून तुषार देशपांडे आणि महेश टीक्षाना यांनी प्रत्येकी दोन गडी बाद केले. त्याचवेळी आकाश सिंग, मोईन अली, रवींद्र जडेजा आणि मथिशा पाथिराना यांना प्रत्येकी एक विकेट मिळाली.

अजिंक्य रहाणेला सामनावीर पुरस्काराने गौरविण्यात आले.