सावंतवाडी

आज दि. १८ ऑगस्ट २०२२, गुरुवार रोजी स्टेपिंग स्टोन ग्लोबल स्कूलमध्ये गोकुळाष्टमीचा उत्सव मोठ्या जल्लोषात साजरा केला गेला. शाळेचे संचालक आदरणीय श्री. रुजूल पाटणकर व सौ. काश्मिरा पाटणकर तसेच, शाळेच्या मुख्याध्यापिका सौ. दिशा कामत यांच्या हस्ते दीपप्रज्वलन करण्यात आले व कार्यक्रमाला सुरुवात करण्यात आली. प्रथम विद्यार्थ्यांना अनुक्रमे इंग्रजी व मराठी भाषेत गोपाळकाला म्हणजे काय?, तसेच जन्माष्टमी व दहीहंडी यांचे महत्त्व व त्याबद्दल सविस्तर माहिती देण्यात आली. इ. २ री व ३ रीच्या विद्यार्थ्यांनी गोकुळाष्टमीवर आधारित गीत सादर केले. तसेच, इ. १ ली, ३ री व ४ थी च्या विद्यार्थ्यांनी दहीहंडीची प्रथा कशी सुरु झाली? हे नाट्य प्रदर्शनाद्वारे प्रदर्शित केले. तर, इ. १ ली व २ री च्या विद्यार्थ्यांनी दहीहंडी या सणावर आधारित नृत्य सादर केले. त्याचप्रमाणे, इ. ३ री व ४ थी च्या विद्यार्थ्यांनी दहीहंडी फोडण्याचा कार्यक्रम केला. या उत्सवात सर्व विद्यार्थी, उपस्थित शिक्षक व शिक्षकेत्तर कर्मचारी, मदतनीस आनंदाने सहभागी झाले. व शेवटी आभार प्रदर्शनाने कार्यक्रमाची सांगता करण्यात आली. अशाप्रकारे मोठ्या जल्लोषात व उत्साहात हा कार्यक्रम साजरा करण्यात आला.