*जागतिक साहित्य कला व्यक्तित्व विकास मंच सदस्या ज्येष्ठ लेखिका कवयित्री सौ ज्योत्स्ना तानवडे यांची अप्रतिम अभंग रचना*
🙏 *पुरुषोत्तम* 🙏
जन्मोत्सव आला | श्रीरामचंद्रांचा |
आदर्श गुणांचा | श्रेष्ठ राजा ||
आदर्श पती तो | एकपत्नी व्रत |
जपे प्रजाहित | सीता त्यागे ||
परमदयाळू | तो पुरुषोत्तम |
श्रेष्ठ राजधर्म | आचरिला ||
पराक्रमी राजा | असीम धैर्याचा |
स्थितप्रज्ञतेचा | मेरुमणी ||
एकवचनी तो | असे एकबाणी |
अमृताची वाणी | जनाप्रति ||
धर्म रक्षणार्थ | मर्यादा पालन |
राघव वचन | रामबाण ||
रामचरित्राचा | करूनी अभ्यास |
आचरावे खास | रामगुण ||
ज्योत्स्ना तानवडे.
वारजे, पुणे
