जागतिक साहित्य कला व्यक्तित्व विकास मंच सदस्य ज्येष्ठ लेखक कवी श्री अरविंदजी ढवळीकर यांची काव्यरचना

भोळी वेण्णा वयही कोवळे
प्रपंचास पारखी
प्रौढपणे एकाकीच वाहे
दुःखाची पालखी

वास्तव स्वीकारिले कसोटी
समज वर्तनाची
रामभक्तीची गोडी उपजत
श्रवण कीर्तनाची

भागवताची सोबत तुळशी
वृंदावनी आसरा
हरिभक्तीची वाट गवसली
भक्तीच्या निर्झरा

कानी पडता समर्थ वाणी
निजानंद पावली
जसा भाव हो तसा देव ही
प्रचिती अनुभवली

जीव शिवही आत्मा परमात्मा
संभ्रम ते मिटले
उपदेशातुन घडली शिष्या
प्रश्न मनी सुटले

पारमार्थिक अधिकारे पटला
जीवनातला अर्थ
हात मस्तकी गुरुचा जय जय
रघुवीर समर्थ

अरविंद
16/5/21