ग्राहक पंचायत महाराष्ट्र संस्थेची शासनाकडे मागणी.
वैभववाडी
सध्या महाराष्ट्र परिवहन महामंडळ अर्थात एसटी कर्मचाऱ्यांचे काम बंद आंदोलन सुरू होऊन अनेक दिवस झाले. या संपामुळे विद्यार्थ्यां वर्ग व सर्वसामान्य प्रवासी ग्राहक यांची होणारी गैरसोय लक्षात घेता एसटी कर्मचारी संघटना व शासन यांनी समन्वयातून मार्ग काढावा आणि सर्वसामान्यांची होणारी गैरसोय दूर करावी, अशी मागणी ग्राहक पंचायत महाराष्ट्र- कोकण विभाग,सिंधुदुर्ग जिल्हा शाखा आणि महाराष्ट्र प्रदेश प्रवासी महासंघ, सिंधुदुर्ग जिल्हा शाखा यांच्यावतीने राज्याचे मुख्यमंत्री मा.उद्धव ठाकरे व परिवहन मंत्री मा.अनिल परब यांच्याकडे मेलद्वारे केली आहे. सदर मेलची प्रत मा.जिल्हाधिकारी, सिंधुदुर्ग व मा.विभाग नियंत्रक सिंधुदुर्ग यांना पाठवली आहे.
एसटी ही ग्रामीण भागातील विशेषतः विद्यार्थी व नागरिकांच्या हक्काचे आणि सुरक्षित साधन म्हणून महत्त्वाची भूमिका बजावित आहे. कोरोना महामारीच्या पार्श्वभूमीवर अनेक दिवस बंद असलेल्या शाळा व महाविद्यालये नुकतीच सुरू झाली आहेत. या संपामुळे विद्यार्थी बस सुविधेअभावी शिक्षणापासून वंचित राहतो आहे. ही बाब चिंतनीय असून एसटी संप कर्मचारी व शासन यांच्या ताठर भूमिकेमुळेच संप न मिटता अधिक चिघळण्यास दोघेही जबाबदार असल्याची भावना जनतेतून व्यक्त होते आहे. या संपाचे राजकारण न होता एसटी कर्मचारी संघटना व शासन यांच्यामध्ये चर्चा होऊन समन्वयातून तडजोडीने योग्य मार्ग काढावा व सर्वसामान्य प्रवासी ग्राहकांची होणारी गैरसोय टाळावी अशी मागणी ग्राहक पंचायत महाराष्ट्र संस्थेचे राज्य सदस्य व सिंधुदुर्ग जिल्हा अध्यक्ष प्रा.श्री.एस.एन.पाटील, उपाध्यक्ष श्री.एकनाथ गावडे, संघटक श्री.सिताराम उर्फ दादा कुडतरकर, सचिव श्री.संदेश तुळसणकर तसेच महाराष्ट्र प्रदेश प्रवासी महासंघाचे जिल्हाध्यक्ष श्री. तेजस साळुंखे व संघटक श्री. जितेंद्र पिसे यांनी मेलद्वारे केली आहे.
