जागतिक मराठी “साहित्य कला व्यक्ती” विकास मंचच्या सदस्या, विविध पुरस्कार प्राप्त जेष्ठ कवयित्री प्रा.सौ. सुमती पवार यांची काव्यरचना
बाहेर चांदण्यात ,मज साद तुझी आली
आणि पुन्हा नव्याने ,मी पहा सजुनी आली ….
तो चंद्र तो चकोर, मन होई भावभोर
तो शीत शीत वायु, तो गगनी चंद्रमोर
तू शोध मज आता..मी भाव वेल झाली…
बाहेर चांदण्यात ……
तू मोकळा मुकुंद,मज दूर हाक मारी
मी बैसले रे येथे , बघ कालिंदी किनारी
मज शोध शोधता रे , भूमी धुक्यात न्हाली
बाहेर चांदण्यात ….
अद्वैत रे मनांचे,उठले पहा तरंग
पाण्यात दर्पणी या, मज भासतो श्रीरंग
मी मनी दर्पणात,तेव्हा तुझीच झाली
बाहेर चांदण्यात …
हा खेळ जीवनात, प्रीतीत डुंबण्यात
हृदयात बैस माझ्या,ठेवते लोचनात
तू आठवे मनात, चढली पहाच लाली..
बाहेर चांदण्यात …
मज साद… तुझी…
आली ……
प्रा. सौ. सुमती पवार नाशिक
(९७६३६०५६४२)
