जागतिक मराठी साहित्य कला व्यक्ती विकास मंच सदस्य दीपक पटेकर यांची पितृपक्षातील महालय श्राद्ध आणि जिवंतपणी नात्यांकडे केलेला दुर्लक्ष यावर भाष्य करणारी काव्यरचना

पितृपक्षात श्राद्धविधी
पित्तरांची केली सेवा
जिवंतपणी आईबाप
अन्नासाठी महाग देवा

असे पर्यंत आईबाप
त्यांना पोटभर घाला
कोणी पाहिला आत्मा
म्हणे तृप्त तोचि झाला

आईबापाच्या नावाने
दुजास अन्नदान केले
आत्म्यापेक्षा जन्मदाते
श्रेष्ठ कसे नाही वाटले

पोट भरण्या मुलाबाळांचे
आईबापाने कष्ट उपसले
हास्य मुलाच्या मुखावर
त्यांच्या घामातूनच आले

भिंतीवर फोटो टांगून
तिथीला केली आठवण
विसरतील का मृतात्मे
अपमानीत झालेले क्षण

पिठाचे पिंड पूजुनी
कावळ्यास वाढी पानात
एवढं करून मिळेल का
स्थान आईबापाच्या मनात?

©[दिपी]✒️
दीपक पटेकर, सावंतवाडी
८४४६७४३१९६