पुलाच्या भूमिपूजनप्रसंगी विकासकामांचा घेतला आढावा; दर्जेदार कामासाठी ठेकेदार आणि अधिकाऱ्यांकडे नियमित पाठपुरावा करणार

कुडाळ :

कुडाळ-मालवण मतदारसंघातील रखडलेली विकासकामे मार्गी लावण्यासोबतच आगामी काळात मोठ्या प्रमाणावर विकासनिधी उपलब्ध करून देण्यासाठी प्रयत्न करणार असल्याचा निर्धार आमदार निलेश राणे यांनी व्यक्त केला. हळदीचे नेरूर येथील पुलाच्या भूमिपूजनप्रसंगी त्यांनी पुलाचे काम वर्षभरात पूर्ण करण्यासाठी पाठपुरावा करण्याचे आश्वासन दिले. तसेच, पुलाचे काम दर्जेदार व्हावे, यासाठी संबंधित ठेकेदार आणि सार्वजनिक बांधकाम विभागाच्या अधिकाऱ्यांवर लक्ष ठेवणार असल्याचे स्पष्ट केले. कुडाळ-मालवण मतदारसंघाच्या विकासाचा आराखडा किमान पाच हजार कोटी रुपयांपर्यंत नेण्याचाही मानस त्यांनी यावेळी बोलून दाखविला.

या कार्यक्रमाला जिल्हा परिषद अध्यक्ष प्रमोद कामत, उपाध्यक्ष दादा साईल, शिवसेना जिल्हाप्रमुख दत्ता सामंत, कुडाळ पंचायत समिती सभापती मिलिंद नाईक, जिल्हा परिषद सदस्य दीपक नारकर, जिल्हा परिषद सदस्या दीपलक्ष्मी पडते, जिल्हा परिषद बांधकाम सभापती संतोष सातविलकर, जिल्हा बँक संचालक प्रकाश मोर्ये, मोहन सावंत, दिलीप सावंत, उपजिल्हाप्रमुख आनंद शिरवलकर, तालुकाप्रमुख विनायक राणे, देवेंद्र नाईक, निवृत्त पोलीस अधिकारी सतीश कविटकर, राजा धुरी आदी उपस्थित होते.

हळदीचे नेरूर येथील पुलाचे काम पूर्ण झाल्यानंतर नागरिकांची गैरसोय दूर होण्यास मदत होणार आहे. या पुलाच्या कामासाठी स्थानिक ग्रामस्थ दिलीप सावंत यांनी सातत्याने पाठपुरावा केला. त्यामुळेच आज या कामाचे भूमिपूजन होत असल्याचे आमदार निलेश राणे यांनी सांगितले.

ते म्हणाले की, आपण आमदार झाल्यापासून दिलीप सावंत यांची भेट झाली की हळदीच्या नेरूर पुलाचा विषय नेहमी चर्चेत येतो. त्यांचा फोन आला तरी या पुलाच्या कामाची आठवण होते. पुलाचे काम एका वर्षाच्या आत पूर्ण करण्यासाठी प्रयत्न केले जातील. ८ सप्टेंबर २०२७ ही काम पूर्ण करण्याची तारीख असून, ठेकेदार आणि सार्वजनिक बांधकाम विभागाच्या अधिकाऱ्यांकडे नियमित पाठपुरावा करण्यात येईल. ठेकेदारांनी मात्र मार्च महिन्यापर्यंत पूल पूर्ण करण्याचे स्पष्ट केले आहे. पुलाचे काम दर्जेदार व्हावे, हीच आपली अपेक्षा असल्याचे त्यांनी नमूद केले.

कुडाळ-मालवण मतदारसंघातील अनेक विकासकामे मागील दहा वर्षांपासून रखडली आहेत. अनेक पुलांची कामे अद्याप पूर्ण झालेली नाहीत. ही कामे पूर्ण करण्यासाठी आपण प्रयत्नशील असून, लोकांनी काम करण्यासाठी निवडून दिले आहे, टीका करण्यासाठी नाही, असे आमदार राणे म्हणाले.

हळदीच्या नेरूर पुलासोबतच त्याला लागून असलेला रस्ताही पूर्ण करण्याचा आपला मानस आहे. मागील दहा वर्षांत या भागात विकासकामे का झाली नाहीत, याचा विचार होणे आवश्यक आहे. कुडाळ-मालवण मतदारसंघ विकासापासून वंचित राहिला असून, २०२४ पासून हा मतदारसंघ पुन्हा विकासाच्या मार्गावर आणण्यासाठी प्रयत्न सुरू केले आहेत. मतदारसंघाचा विकास काय असतो, हे प्रत्यक्ष कामातून दाखवून देण्याचा आपला प्रयत्न असल्याचे त्यांनी स्पष्ट केले.

पुढील दीड वर्षांत आपण मतदारसंघात कोणती कामे करतो, हे नागरिकांनी पाहावे. आपल्यावर दररोज टीका होत असली तरी त्याकडे लक्ष न देता विकासकामांवर भर देणार आहोत. ज्यांनी दहा वर्षांत काही काम केले नाही, ते आता दीड वर्षातील कामांचा हिशेब मागत आहेत, अशी टीका करत त्यांनी विरोधकांना प्रत्युत्तर दिले.

आपली स्पर्धा कोणाशीही नसून ती बौद्धिक स्तरावर असावी, असे आमदार निलेश राणे यांनी सांगितले. येत्या पाच वर्षांत आपण करणार असलेली कामे इतरांनी करून दाखवली, तर आपण आपल्या हातातील शस्त्रे टाकायला तयार आहोत, असे आव्हानही त्यांनी दिले. विधानसभेत प्रश्न मांडताना आपण घाबरत नाही किंवा कोणत्या बाजूला बसतो, याचा विचार करत नाही. कोणासमोर गुडघे टेकण्याची भाषा आपण करणार नाही, असेही ते म्हणाले.

“मी २५ वर्षे इथे टिकण्यासाठी आलो नाही. लोकांनी मला पाच वर्षांसाठी निवडून दिले आहे. ज्या मतदारसंघात माझ्या वडिलांचा पराभव झाला, त्याच मतदारसंघात लोकांनी मला निवडून दिले. याच जिल्ह्यातून माझे वडील आता खासदार आहेत आणि माझे भाऊ पालकमंत्री आहेत. राणे कुटुंबाला येथील लोकांनी जे दिले, ते आम्ही उभ्या आयुष्यात विसरू शकत नाही,” अशी भावना त्यांनी व्यक्त केली.

टाळंबा प्रकल्पाबाबत बोलताना आमदार निलेश राणे यांनी हा प्रकल्प आपण जिवंत असेपर्यंत होऊ देणार नाही, असे आश्वासन उपस्थितांना दिले. २०२४ पासून या भागात विकासकामे करण्यासाठी आपण प्रयत्नशील असून, भविष्यात या भागात किती विकासकामे झाली, याचा हिशेब नागरिकांना पाहता आला पाहिजे, असे त्यांनी सांगितले.

कुडाळ-मालवण मतदारसंघाच्या विकासासाठी मोठ्या प्रमाणावर निधीची आवश्यकता असल्याचे सांगताना आमदार राणे यांनी मागील दहा वर्षांतील विकासकामांचा मुद्दा उपस्थित केला. कणकवली आणि सावंतवाडी मतदारसंघांत विकासकामे होत असताना कुडाळ-मालवणमध्ये अपेक्षित विकास झाला नाही, असा दावा त्यांनी केला. या मतदारसंघासाठी पूर्वी २०० कोटी रुपयांचा निधी मिळत होता; मात्र तोही वेळेवर उपलब्ध होत नव्हता. जिल्हा नियोजनाच्या आराखड्यात मतदारसंघाला ३५ कोटी रुपयेही मिळत नव्हते, असे ते म्हणाले.

आता कुडाळ-मालवण मतदारसंघाच्या विकासाचा आराखडा हजारो कोटी रुपयांपर्यंत पोहोचला असून, तो किमान पाच हजार कोटी रुपयांपर्यंत नेण्यासाठी प्रयत्न सुरू राहतील, असे आश्वासन त्यांनी दिले. विकास हा महायुतीच्या सरकारमध्येच होऊ शकतो, असे सांगत जिल्हा परिषदेची कामेही पारदर्शकपणे सुरू असल्याचे त्यांनी नमूद केले.

मुख्यमंत्री एकनाथ शिंदे यांनी सिंधुदुर्ग जिल्हा परिषदेसाठी ५० कोटी रुपयांचा निधी देण्याचे आश्वासन दिले होते. हा निधी लवकरात लवकर उपलब्ध करून घेण्यासाठी प्रयत्न करणार असल्याचे आमदार निलेश राणे यांनी यावेळी सांगितले.