आंबोली वर्षासहलीत सावंतवाडीतील ज्येष्ठ नागरिकांनी अनुभवला निसर्गाचा स्वर्गीय आनंद

ज्येष्ठ नागरिक संघ व विनायक पर्यटनच्या संयुक्त उपक्रमातून पर्यावरण जनजागृतीसह संस्मरणीय सहल; बाबा धबधबा, कावळेसाद व ग्लोबल एक्वेरियमला भेट

सावंतवाडी

ज्येष्ठ नागरिक संघ, सावंतवाडी आणि विनायक पर्यटन सहकारी संस्था यांच्या संयुक्त विद्यमाने आयोजित करण्यात आलेली आंबोली परिसरातील वर्षासहल ज्येष्ठ नागरिकांसाठी अविस्मरणीय ठरली. निसर्गरम्य वातावरण, पर्यावरणाविषयीचे मार्गदर्शन आणि आनंददायी सहप्रवास यामुळे सहभागी ज्येष्ठ नागरिकांनी नवचैतन्याचा अनुभव घेतला.

सहलीची सुरुवात सावंतवाडीतील श्री उपरलकर जागृत देवस्थान यांच्या दर्शनाने झाली. राष्ट्रवादी काँग्रेसचे सावंतवाडी तालुकाध्यक्ष उदय भोसले तसेच मरीन इंजिनियर प्रशांत सावळ यांनी श्रीफळ वाढवून तसेच पुष्पगुच्छ देऊन सहलीला शुभेच्छा दिल्या.

सहलीचे नियोजन ज्येष्ठ नागरिक संघाचे उपाध्यक्ष राजेंद्र बिर्जे, सचिव प्रकाश राऊळ आणि विनायक पर्यटनचे संचालक दीनानाथ बांदेकर यांनी केले. त्यांच्या नियोजनामुळे संपूर्ण प्रवास सुरक्षित, शिस्तबद्ध आणि आनंददायी झाला.

फुलपाखरू तज्ज्ञ हेमंत ओगले यांच्या व्हिस्टलिंग वूड रेस्टॉरंट येथे नाश्त्यानंतर सर्वांनी बाबा धबधब्याच्या निसर्गसौंदर्याचा मनमुराद आनंद लुटला. त्यानंतर हेमंत ओगले आणि पर्यावरणप्रेमी काका भिसे यांनी जैवविविधता, पर्यावरण संवर्धन आणि मानव-निसर्ग यांचे अतूट नाते यावर मार्गदर्शन केले. त्यांच्या अभ्यासपूर्ण विवेचनातून पर्यावरण संरक्षणाचा महत्त्वपूर्ण संदेश उपस्थितांपर्यंत पोहोचला.

दुपारच्या भोजनानंतर कावळेसाद पॉईंट आणि आंबोली मुख्य धबधब्याला भेट देत सह्याद्रीच्या निसर्गवैभवाचा अनुभव घेण्यात आला. धुक्याने वेढलेले डोंगर, कोसळणारे धबधबे आणि हिरवाईने नटलेला परिसर पाहून सहभागी भारावून गेले.

सहलीच्या शेवटच्या टप्प्यात केसरी येथील ग्लोबल एक्वेरियमला भेट देण्यात आली. विविध देशांतील दुर्मिळ मासे व आकर्षक पक्षी पाहून ज्येष्ठ नागरिकांनी सृष्टीच्या वैविध्याचा आनंद घेतला.

संपूर्ण दिवस निसर्गाच्या सान्निध्यात घालवत सहभागी ज्येष्ठ नागरिकांनी दैनंदिन जीवनातील ताणतणाव विसरून आनंद, मैत्री आणि पर्यावरणप्रेमाचा सुंदर अनुभव घेतला. सहलीच्या यशस्वी आयोजनाबद्दल सर्व सहभागी सदस्यांनी ज्येष्ठ नागरिक संघ व विनायक पर्यटनच्या पदाधिकाऱ्यांचे मनःपूर्वक आभार मानले.