*जागतिक साहित्य कला व्यक्तित्व विकास मंचच्या सन्मा सदस्या ज्येष्ठ लेखिका कवयित्री ज्योत्स्ना तानवडे लिखित अप्रतिम काव्यरचना*
*” कृष्णावतार “*
हा मोहन मुरलीवाला
कारागृहात अवतरला
आनंद विभोर असा तो
घन काळा बरसत गेला ||
यमुना दुथडी ही नाचे
आनंदा उधाण आले
सांगावा गरजत जाई
सुख सोनपावली आले ||
रोमांचित नंद यशोदा
परब्रह्मच पदरी आले
आनंदोत्सव भूवर हा
भाग्याचे द्वार उघडले ||
कापरे भरे दुष्टांना
सज्जनास अभय मिळाले
भूमंडळ प्रसन्न झाले
मंदिरात उत्सव चाले ||
विनवणी ऐकली त्याने
रक्षणार्थ धावत आला
स्थापण्या पुन्हा धर्माला
कृष्णावतार हा झाला ||
श्रीकृष्ण नाव प्रेमाचे
श्रीकृष्ण नाव सत्याचे
श्रीकृष्ण नाव कर्माचे
श्रीकृष्ण नाव धर्माचे ||
*ज्योत्स्ना तानवडे. पुणे*
