*जागतिक साहित्य कला व्यक्तित्व विकास मंचच्या सन्मा सदस्या ज्येष्ठ लेखिका कवयित्री सौ. मंजिरी अनसिंगकर लिखित अप्रतिम पाळणा गीत रचना*

*कृष्णजन्म पाळणा*

मध्य रात्रीला,श्रावणाष्टमीला

बाळकृष्ण जन्मला,ग बाई कृष्णजन्मला ||धृ||

घनघोर पाऊसधारा,

तुरूंग निजला सारा

अशा काजळ रातीला

परब्रम्ह लाभले देवकीला

आनंदे कवटाळले बाळाला

कृष्ण जन्मला ग बाई कृष्ण जन्मला||१||

दिव्य कांती रूप सुंदर

लोभस, गोंडस बाळ श्रीधर

प्रेमाश्रुंनी बाळ नाहला

चुंबीले,जोजवले मुकुंदाला

सोडवेना त्या,सावळ्या बाळाला

कृष्ण जन्मला ग, बाई कृष्ण जन्मला||२||

गोकुळी,नंदाघरी सुखरूप

पोहचले बाळ,पाहिले श्रीरूप

हले पाळणा, रेशीम दोरी

आनंदमोद तो वाहे घरोघरी

नामकरण सोहळा थाटला

कृष्ण जन्मला ग बाई कृष्ण जन्मला.||३||

माता यशोदा,धन्य जाहली

कुशीत, कान्हा येता आनंदली

भावविभोर,पाही एकटक माधवाला

पदराखाली घेता,लडिवाळास

स्तनपानाला

कृष्ण जन्मला ग बाई,कृष्ण जन्मला||३||

दृष्ट नका लावू गडे मम बाळाला

चित्तचोर मोहवी ,सकल जनाला

मधाळ हंसू,विलसे ओठांवरी

प्रेमळ. नजर श्री मुखावरी

पदराने दृष्ट काढते, ओवाळते कान्ह्याला

कृष्ण जन्मला ग बाई कृष्ण जन्मला.,||४||

नको रूणझुण सख्यांनो पैंजणांची

नीजे तान्हुला,गरज शांततेची

मुठी चोखत, पहुडला पाळण्यात

ब्रम्हानंदी रंगला, ग,तो सुखात

पारावार न उरे आनंदाला

कृष्ण जन्मला ग बाई कृष्ण जन्मला.||५||

सौ.मंजिरी अनसिंगकर नागपूर.