*जागतिक साहित्य कला व्यक्तित्व विकास मंचचे सन्मा सदस्य कवी शशांक देशमुख लिखित अप्रतिम काव्यरचना*
*भ्रमणध्वनी (मोबाईल)…*
खेडी असो वा शहरं
झाली पार सुनीसुनी
जो तो बसला हाताशी
घेऊन भ्रमणध्वनी ।। १ ।।
झाला मोबाईल जसा
जीवप्राण माणसाचा
कसा पडता हाताशी
कोण उरतो कुणाचा ।। २ ।।
नाही राहिली अंगाई
गाई-गाईची ती गाणी
बाळ झोपण्याच्या आधी
मागते भ्रमणध्वनी ।। ३ ।।
झाले अतीतात गार
जीवलग सवंगडी
कसा सगा मोबाईल
गेली नात्यांनाही तडी ।। ४ ।।
ग्रंथ पुस्तके तयांना
कोण वाचण्या तयार
मोबाईलमुळे जशी
झाली कपाटी-भंगार ।। ५ ।।
दिसे मोबाईल आता
जनी बनला विशेष
ग्रंथ वाचन-लिखाण
कसे उरले ना शेष ।। ६ ।।
✍️शशांक दिनकरराव देशमुख
चांदुरबाजार, जि. अमरावती
(महाराष्ट्र राज्य) – ४४४ ७०४
मो. क्र. ९९२३५३६३२५
