उमेदवारांच्या खर्चाच्या नोंदवहीची व्दितीय तपासणी पुर्ण

 सिंधुदुर्गनगरी 

  निवडणूक खर्च निरीक्षक यांच्या उपस्थितीत उमेदवारांच्या खर्चाच्या नोंदवहीची व्दितीय  तपासणी करण्यासाठी सिंधुदुर्ग जिल्हयातील तीनही विधानसभा मतदार संघाची एकत्रीत बैठक संपन्न झाली, असल्याची माहिती जिल्हा खर्च सनियंत्रण समितीचे समन्वय अधिकारी अमित मेश्राम यांनी दिली आहे.

            या बैठकीस जिल्हा निवडणूक अधिकारी तथा जिल्हाधिकारी अनिल पाटील, निवडणूक खर्च निरीक्षक डॉ. दिव्या के.जे., समन्वय अधिकारी जिल्हा खर्च सनियंत्रण समिती अमित के. मेश्राम व डॉ. शिवप्रसाद खोत, तीनही विधानसभा मतदार संघातील सहाय्यक खर्च निरीक्षक, लेखापथक, व्हिडीओ पाहणी पथक प्रमुख तसेच निवडणूक लढवणारे उमेदवार, प्रतिनिधी या बैठकीस उपस्थितीत होते.

            या बैठकीमध्ये निवडणूक खर्च निरीक्षक डॉ. दिव्या के.जे  यांनी उमेदवारांचे नामनिर्देशन दिनांकापासून ते दि.11 नोव्हेंबर 2024 पर्यंतचे सर्व उमेदवारांचे खर्चाच्या नोंदवहीची तपासणी करुन  यामधील उणिवांबाबत अभिप्राय दिला. खर्च निरीक्षक यांनी निवडणूक तपासणीच्या वेळेस उमेदवारांच्या खर्चाच्या दिनांकनिहाय वर्तमानत्रामध्ये दिसून आलेले कार्यकर्त्यांचा पक्षामधील प्रवेश, प्रचार कार्यालयाचे उद्घाटन, प्रचारादरम्यान गावोगावी काढण्यात येणाऱ्या प्रचार फेऱ्या, प्रचारसभा या सर्व ठिकाणी करण्यात आलेला खर्च हा उमेदवारांच्या खर्चाच्या लेख्यामध्ये नोंदविला असल्याबाबतची खात्री केली.  तपासणीदरम्यान वर्तमान पत्रामध्ये दिसून आलेल्या बातम्यांचा खर्च उमेदवारांनी लेख्यात नोंदविला असल्याबाबत खात्री करणार असल्याचे सांगितले. उमेदवारांनी प्रचारासाठी टी.व्ही. , वर्तमानपत्रामधील न्युज, हँडबील व सोशल मीडिया तसेच अन्य मार्गाने केलेला खर्च हा लेख्यामध्ये नोंदवावा अशाही सूचना दिल्या.  तसेच निवडणूक खर्चाचे सनियंत्रण करणारी समिती ही उमेदवारांकडून करण्यात येणाऱ्या सर्व प्रकारच्या खर्चावर बारकाईने नजर ठेवून असलेबाबत सर्व उमेदवारांना, प्रतिनिधींना अवगत केलेले आले आहे. दिनांक 11 नोव्हेंबर 2024 पर्यंतचा खर्च मुख्य निवडणूक अधिकारी, महाराष्ट्र राज्य यांच्या संकेतस्थळावर प्रसिद्ध करण्यात आलेला आहे. तसेच उमेदवाराने सादर केलेले लेखे कोणत्याही व्यक्तीस रु. 1/- प्रती पान या दराप्रमाणे उपलब्ध होवू शकतील.