*रविवारी कोलकातासोबत जेतेपदाचा सामना*
मुंबई (गुरुदत्त वाकदेकर) :
शाहबाज अहमदच्या नेतृत्वाखालील गोलंदाजांनी केलेल्या उत्कृष्ट कामगिरीच्या जोरावर सनरायझर्स हैदराबादने क्वालिफायर-२ मध्ये राजस्थान रॉयल्सचा पराभव करून आयपीएल २०२४ हंगामाच्या अंतिम फेरीत प्रवेश केला. हैदराबाद संघ यापूर्वी २०१८ च्या हंगामातील विजेतेपदाच्या सामन्यात पोहोचला होता जिथे त्यांना चेन्नई सुपर किंग्सकडून पराभव स्वीकारावा लागला होता. हैदराबादचा संघ २०१८ नंतर कधीही विजेतेपदाच्या लढतीत उतरला नव्हता आणि आता सहा वर्षांनंतर अंतिम फेरीत खेळणार आहे. हैदराबादचा रविवारी कोलकाता नाईट रायडर्सशी सामना होईल, ज्यांनी क्वालिफायर-१ मध्ये सनरायझर्सचा पराभव करून अंतिम फेरीत प्रवेश केला होता.
राजस्थानचा कर्णधार संजू सॅमसनने नाणेफेक जिंकून प्रथम गोलंदाजी करण्याचा निर्णय घेतला होता, परंतु हैदराबादने खराब सुरुवातीतून सावरले आणि हेनरिक क्लासेनच्या ३४ चेंडूत ५० धावांच्या अर्धशतकाच्या जोरावर २० षटकांत ९ गडी गमावून १७५ धावा केल्या. प्रत्युत्तरात ध्रुव जुरेलने अर्धशतक झळकावून संघाच्या आशा सामन्यात ठेवण्याचा प्रयत्न केला, मात्र आवश्यक धावगती इतकी जास्त होती की जुरेलचे प्रयत्नही कामी येऊ शकले नाहीत. राजस्थानने २० षटकांत सात गडी गमावून १३९ धावा केल्या. हैदराबादसाठी प्रभावी खेळाडू म्हणून आलेला फिरकीपटू शाहबाज अहमदने उत्कृष्ट गोलंदाजी केली. शाहबाजने तीन विकेट घेतल्याने राजस्थानचा डाव गडगडला.
आयपीएलच्या प्लेऑफमधील ११ सामन्यांमधला राजस्थान संघाचा हा सहावा पराभव आहे. आयपीएलच्या प्लेऑफमध्ये सर्वाधिक सामने गमावणारा राजस्थान हा सहावा संघ आहे. प्लेऑफमध्ये सर्वाधिक सामने गमावण्याचा विक्रम आरसीबीच्या नावावर आहे, त्यांनी १६ सामन्यांमध्ये १० सामने गमावले आहेत, तर दुसऱ्या स्थानावर सीएसके संघ आहे ज्याने २६ प्लेऑफ सामन्यांमध्ये नऊ सामने गमावले आहेत. दुसरीकडे, हैदराबादचा संघ तिसऱ्यांदा आयपीएलची अंतिम फेरी गाठण्यात यशस्वी ठरला. हैदराबादचा संघ २०१६ मध्ये पहिल्यांदा विजेतेपदाच्या सामन्यात पोहोचला होता, त्यावेळी संघाने विजेतेपद पटकावले होते.
लक्ष्याचा पाठलाग करताना यशस्वी जैस्वाल आणि टॉम कोहलर कॅडमोर यांनी राजस्थानला दमदार सुरुवात करून दिली, मात्र हैदराबादचा कर्णधार पॅट कमिन्सने कॅडमोरला बाद करून ही भागीदारी भेदली. कॅडमोर १० धावा करून तंबूमध्ये परतला. यानंतर यशस्वीने वेगाने धावा काढण्यास सुरुवात केली. शाहबाजने त्याला बाद केले तेव्हा यशस्वी आपल्या अर्धशतकाकडे वाटचाल करत होता. यशस्वी २१ चेंडूंत चार चौकार आणि तीन षटकारांच्या मदतीने ४२ धावा करून बाद झाला. यशस्वी बाद झाल्यानंतर राजस्थानचा डाव गडगडला आणि जुरेल वगळता संघाच्या अन्य कोणत्याही फलंदाजाला मोठी खेळी करता आली नाही. शाहबाजच्या नेतृत्वाखाली हैदराबादच्या गोलंदाजांनी ठराविक अंतराने राजस्थानच्या विकेट घेतल्या. राजस्थानची फलंदाजी इतकी खराब झाली होती की संघाचे फक्त चार फलंदाज दुहेरी आकडा गाठू शकले. मात्र, जुरेलने प्रतिकूल परिस्थितीत शानदार फलंदाजी करत अर्धशतक झळकावले. जुरेल ३५ चेंडूंत सात चौकार आणि दोन षटकारांच्या मदतीने ५६ धावा करून नाबाद राहिला.
पॅट कमिन्सने या मोसमात १७ विकेट घेतल्या आहेत आणि कर्णधार म्हणून आयपीएल हंगामात सर्वाधिक विकेट्स घेण्याच्या बाबतीत अनिल कुंबळेची बरोबरी केली आहे. कुंबळेने २०१० मध्ये आरसीबीचा कर्णधार असताना १७ बळी घेतले होते आणि आता कमिन्सनेही कर्णधार म्हणून तेवढ्याच विकेट घेतल्या आहेत. आयपीएलच्या कोणत्याही मोसमात कर्णधार म्हणून सर्वाधिक विकेट्स घेण्याचा विक्रम राजस्थान रॉयल्सचा माजी कर्णधार शेन वॉर्नच्या नावावर आहे ज्याने २००८ च्या मोसमात १९ बळी घेतले होते. जर कमिन्स अंतिम सामन्यात तीन विकेट घेण्यात यशस्वी ठरला तर तो या बाबतीत शेन वॉर्नला मागे टाकेल.
तत्पूर्वी, राजस्थानचा कर्णधार संजू सॅमसनने नाणेफेक जिंकून प्रथम गोलंदाजी करण्याचा निर्णय घेतला आणि वेगवान गोलंदाज ट्रेंट बोल्टने कर्णधाराचा निर्णय योग्य असल्याचे सिद्ध करण्यात वेळ वाया घालवला नाही. बोल्टने पहिल्याच षटकात १२ धावा देऊन अभिषेक शर्माची विकेट घेतली. बोल्टने या मोसमात सातव्यांदा पहिल्याच षटकात विकेट घेतली. त्यानंतर जबरदस्त फॉर्ममध्ये दिसत असलेल्या राहुल त्रिपाठीला बोल्टने बाद केले. अभिषेक बाद झाल्यानंतर राहुलने वेगाने धावा काढण्यास सुरुवात केली, मात्र बोल्टने राहुलला फार काळ टिकू दिले नाही. राहुल १५ चेंडूंत पाच चौकार आणि दोन षटकारांच्या मदतीने ३७ धावा करून बाद झाला. यानंतर एडन मार्करामला बाद करून बोल्टने हैदराबादला तिसरा धक्का दिला. मार्करामने एक धाव केली. पॉवरप्लेमध्येच बोल्टने हैदराबादला तीन धक्के दिले आणि त्याने या मोसमात पहिल्या सहा षटकांत १२ बळी घेतले.
बोल्ट पहिल्या सहा षटकांमध्ये कोणत्याही संघासाठी धोकादायक ठरतो आणि हैदराबादविरुद्धच्या त्याच्या उत्कृष्ट गोलंदाजीमुळे त्याने टी-२० मध्ये पॉवरप्लेमध्ये १०० बळी पूर्ण केले. ही कामगिरी करणारा बोल्ट हा तिसरा गोलंदाज ठरला आहे. त्याच्या आधी डेव्हिड विली (१२८ विकेट) आणि भुवनेश्वर कुमार (११८ विकेट) यांनी ही कामगिरी केली होती.
सुरुवातीच्या धक्क्यानंतर हैदराबादचे फलंदाज दडपणाखाली दिसले. या मोसमात तुफानी फलंदाजी करणाऱ्या ट्रॅव्हिस हेडने सलग दोन सामन्यांत शून्यावर बाद झाल्यानंतर या सामन्यात सलामी देण्यात यश मिळवले. हेडने काही फटके खेळून राजस्थानच्या गोलंदाजांवर दबाव टाकण्याचा प्रयत्न केला, मात्र संदीप शर्माने त्याचा डाव संपवला. हेड २८ चेंडूत ३४ धावा करून तंबूमध्ये परतला. सातत्याने चांगली कामगिरी करणाऱ्या नितीश रेड्डीची बॅटही या सामन्यात शांत राहिली आणि त्याला आवेश खानने बाद केले. पाचवा फलंदाज म्हणून नितीश पाच धावा करून बाद झाला. खाते न उघडता बाद झालेल्या अब्दुल समदला आवेशने सलग दुसऱ्या चेंडूवर त्रिफळाचीत बाद केले.
हेनरिक क्लासेनने हैदराबादच्या डावाची धुरा सांभाळली आणि शानदार अर्धशतक झळकावले. प्रभावशाली खेळाडू म्हणून आलेल्या शाहबाज अहमदसह क्लासेनने डाव पुढे नेला. केवळ क्लासेनच्या अर्धशतकी खेळीच्या जोरावर हैदराबाद संघाला आव्हानात्मक धावसंख्या उभारण्यात यश आले. वेगवान गोलंदाज संदीप शर्माने त्याला गोलंदाजी देत क्लासेनचा डाव संपवला. यानंतर आवेश खानने अखेरच्या षटकात १८ धावांवर शाहबाज अहमदला बाद केले, तर हैदराबादच्या डावातील शेवटच्या चेंडूवर जयदेव उनाडकट धावबाद झाला. उनाडकटने दोन चेंडूत पाच धावांचे योगदान दिले. शाहबाज अहमदला सामनावीर पुरस्कार देऊन गौरविण्यात आले.
