*जागतिक साहित्य कला व्यक्तित्व विकास मंचचे सन्मा सदस्य कवी गझलकार यशवंत हिराबाई त्र्यंबक पगारे लिखित अप्रतिम वृत्तबद्ध कविता*

*कविता माझी*

येते कशी जाते कशी नाही कधी सांगत मला

दुःखात येते धावुनी जग दावते नाचत मला //ध्रु//

कविता सखी कविता प्रिया ती नांदते माझ्यासवे

अंधार होता लावते प्रेमातले लामण दिवे

केसात गजरा लावते अन् हासते वेचत मला

दुःखात येते धावुनी जग दावते नाचत मला //१//

युद्धात येते सोबती क्रांतीत गाते शाहिरी

देते उन्हाला सावली पोटात होते बाजरी

ज्या ज्या क्षणाला पाहिजे त्या त्या क्षणी संगत मला

दुःखात येते धावुनी जग दावते नाचत मला //२/

श्वासात ती ध्यासात ती, ती जीवनाची प्रेरणा

कल्पान्त येवो आजही पण हीच माझी साधना

रात्रीस येते,थांबते अन् जागते वाचत मला

दुःखात येते धावुनी जग दावते नाचत मला //३/

+++

यशवंत हिराबाई त्र्यंबक पगारे

बदलापूर

९८९२३३३६८३