*३ ऑगस्ट रोजी बोली सुरू होणार*

 

मुंबई (गुरुदत्त वाकदेकर) :

बिगर बँकिंग वित्तीय कंपनी एसबीएफसी फायनान्स (एसबीएफसी फायनान्स लिमिटेडची इनिशियल पब्लिक ऑफरिंग) पुढील गुरुवारी शेअर बाजारात धडकत आहे. कंपनीने यासाठी स्टॉकची किंमत श्रेणी किंवा किंमत बँड निश्चित केली आहे. प्रति शेअर १० रुपये दर्शनी मूल्याचा प्राइस बँड रुपये ५४ ते ५७ रुपये निश्चित करण्यात आला आहे. या आयपीओच्या माध्यमातून १०२५ कोटी रुपये उभारण्याची कंपनीची योजना आहे.

एसबीएफसी फायनान्स लिमिटेडचे एडी आणि सीईओ म्हणाले की, आयपीओचे सबस्क्रिप्शन ३ ऑगस्ट रोजी उघडेल. यामध्ये सहभागी होण्यासाठी गुंतवणूकदारांना किमान २६० शेअर्ससाठी बोली लावावी लागेल. त्यावर फक्त २६० समभागांच्या पटीत बोली लावावी लागेल. त्याची किंमत बँड रुपये ५४ ते ५७ रुपये निश्चित करण्यात आली आहे, जी दर्शनी मूल्याच्या ५.४ आणि ५.७ पट आहे.

या आयपीओ अंतर्गत ६०० कोटी रुपयांचे नवीन इक्विटी शेअर्स दिले जातील. याशिवाय कंपनीचे प्रवर्तक ४२५ कोटी रुपयांचे शेअर्स ऑफर फॉर सेल अंतर्गत विकणार आहेत. ताज्या शेअर्सच्या विक्रीतून मिळणारी रक्कम व्यवसाय आणि मालमत्तेच्या विस्तारासाठी वापरली जाईल. यासोबतच भविष्यातील भांडवलाच्या गरजा पूर्ण करण्यासाठी कंपनीचा भांडवली आधार वाढवण्यासाठी देखील याचा वापर केला जाईल.

एसबीएफसी फायनान्सने आयपीओसाठी बोली प्रक्रिया सुरू करण्यापूर्वी खाजगी गुंतवणूकीद्वारे १५० कोटी रुपये आधीच उभे केले आहेत. रजिस्ट्रार ऑफ कंपनीजकडे रेड हेरिंग प्रॉस्पेक्टस दाखल होण्यापूर्वीच हे केले गेले. त्यामुळे आयपीओचा आकार १५० कोटी रुपयांनी कमी होऊन ६०० कोटींवर आला आहे. या आयपीओमध्ये कंपनीने काही हिस्सा आपल्या कर्मचाऱ्यांसाठी राखून ठेवला आहे.

एसबीएफसी फायनान्सने सेबीकडे दाखल केलेला हा दुसरा डीआरएचपी आहे. यापूर्वी नोव्हेंबर २०२२ मध्ये पहिल्यांदा ऑफर देण्यात आली होती. आयपीओद्वारे १,६०० कोटी रुपये उभारण्याची योजना त्यावेळी उघड झाली होती. त्यावेळी ७५० कोटी रुपयांच्या नवीन शेअर्सच्या इश्यूसह ८५० कोटी रुपयांची ऑफर फॉर सेल आणण्याची तयारी सुरू होती.