कृषी विभागाच्या गट-क संवर्गातील पदांसाठी अर्ज करण्यासाठी मुदतवाढ

सिंधुदुर्गनगरी

कृषी आयुक्तालय व अधिनस्त विभागीय कृषी सहसंचालक यांच्या आस्थापनेवरील भूतपूर्व दुय्यम सेवा निवड मंडळाच्या कक्षेतील गट-क संवर्गातील वरिष्ठ लिपीक, सहाय्यक अधीक्षक, लघुटंकलेखक, लघुलेखक (निम्न श्रेणी), लघुलेखक (उच्च श्रेणी) या संवर्गातील पदांसाठी सरळसेवेने पदभरतीसाठी 3 एप्रिल 2023 ते 6 एप्रिल 2023 या कालावधीमध्ये जाहीरात प्रसिद्ध करण्यात आली आहे. या जाहिरातीस अनुसरुन अर्ज करण्यासाठीचा अंतीम दिनांक 30 एप्रिल 2023 असा होता. या जाहिरातीसाठी अर्ज करु न शकलेल्या उमेदवारांसाठी दि.13 ते दि. 22 जुलै 2023 या कालावधीत ऑनलाईन अर्ज प्रणाली खुली करण्यात येणार आहे. या जाहिरातीतील नमूद केलेल्या वय, शैक्षणिक अर्हता, अनुभव, पात्रता, परीक्षा शुल्क इतर सर्व संदर्भातील अटी व शर्ती कायम राहतील, याची नोंद घ्यावी, असे आवाहन कृषी आयुक्त सुनील चव्हाण यांनी केले आहे.

शासन निर्णय, महिला व बालविकास विभाग, दि. 4 मे 2023 अन्वये खुल्या प्रवर्गातील महिलांकरीता आरक्षित असलेल्या पदावरील निवडीकरीता खुल्या तसेच मागास प्रवर्गातील महिलांनी नॉन-क्रिमिलेअर प्रमाणपत्र सादर करण्याची अट रद्द करण्यात आली आहे. शासन निर्णयातील तरतुदी पूर्वलक्षी प्रभावाने (Retrospective) दिनांक २९.९.२०२२ नंतरच्या पदभरतीसाठी अंमलात येतील.

कृषी आयुक्तालय व अधिनस्त कार्यालयाच्या आस्थापनेवरील गट-क संवर्गातील विविध पदे भरण्यासाठी विज्ञापित केलेल्या जाहिरातीनुसार ऑनलाईन अर्ज करण्याच्या प्रणालीमध्ये जुन्या निकषानुसार खुल्या प्रवर्गातील महिलांकरीता आरक्षित असलेल्या पदावर अर्ज करण्यासाठी नॉन-क्रिमिलेअर प्रमाणपत्र नसणाऱ्या महिला उमेदवारांना खुल्या प्रवर्गातील पदाकरीता अर्ज करता आले नाहीत, ही वस्तुस्थिती पाहता तसेच शासन निर्णयातील तरतुदी पूर्वलक्षी प्रभावाने अंमलात आल्याने ऑनलाईन अर्ज करता न आलेल्या उमेदवारांना संधी देणे आवश्यक आहे. ही वस्तुस्थिती विचारात घेवून सरळसेवा भरतीसाठी आवेदन पत्र सादर करण्यासाठी 10 दिवसांची मुभा देण्याचा निर्णया कृषी विभागाने घेतलेला आहे.