80 व्या स्वातंत्र्य दिनी तिरंगा फडकला, गुणवंतांचा सन्मान आणि ‘मराठी शाळा वाचवा’ चा संकल्प*

*तरंदळे* :

देशाच्या _80 व्या स्वातंत्र्य दिनानिमित्त_ तरंदळे गावात देशभक्ती, शिक्षण आणि सामाजिक बांधिलकीचा अद्भुत संगम पाहायला मिळाला. ग्रामपंचायत तरंदळे व जिल्हा परिषद शाळेच्या संयुक्त विद्यमाने ध्वजारोहण व गुणवंत विद्यार्थ्यांचा गुणगौरव सत्कार समारंभ मोठ्या उत्साहात साजरा करण्यात आला.

*तिरंगा फडकून राष्ट्रगीताने कार्यक्रमाची सुरुवात*
सकाळी 8 वाजता ग्रामपंचायत कार्यालयासमोर सरपंच *सुशिल कदम* यांच्या हस्ते ध्वजारोहण करण्यात आले. यावेळी उपस्थित सर्व ग्रामस्थ, विद्यार्थी, शिक्षक व मान्यवरांनी एका सुरात राष्ट्रगीत गाऊन अभिवादन केले.

*गुणवंतांचा गुणगौरव*
ध्वजारोहणानंतर जि.प. शाळेतील इयत्ता 1 ली ते 7 वी मधील प्रथम 3 क्रमांकाचे विद्यार्थी तसेच 10 वी व 12 वी मध्ये 60% पेक्षा अधिक गुण मिळवलेल्या गुणवंत विद्यार्थ्यांना प्रमाणपत्र व सन्मानचिन्ह देऊन गौरविण्यात आले.

*सरपंचांचे मनोगत – “व्यसनमुक्त युवा घडवा”*
कार्यक्रमाचे अध्यक्ष सरपंच *सुशिल कदम* यांनी आपल्या मनोगतातून समाजाला आरसा दाखवला. ते म्हणाले,
“80 वर्षांपूर्वी आपल्या पूर्वजांनी रक्त सांडून हे स्वातंत्र्य मिळवून दिले. पण आज खरा प्रश्न आहे – आपण त्या स्वातंत्र्याचा काय उपयोग करतोय?

आजचे गुणवंत हेच उद्याचे देशाचे कर्णधार आहेत. गावातून अधिकारी, डॉक्टर, इंजिनिअर, सैनिक घडावेत हीच आमची इच्छा आहे. पण याचबरोबर मला एक गोष्ट खटकते आणि ती म्हणजे आपला युवा वर्ग.

आज आपल्या गावातील काही तरुण व्यसनाच्या आहारी जाताना दिसत आहेत. मोबाईल, दारू, तंबाखू, गुटखा यांच्या जाळ्यात अडकून आपले आयुष्य बरबाद करत आहेत. हे चित्र पाहून मनाला वेदना होतात. ज्या हातात पुस्तक, पेन आणि तिरंगा असायला हवा तो हात जर व्यसनाकडे जात असेल तर हे स्वातंत्र्याला काळीमा फासणारे आहे.

मी सर्व पालकांना आणि युवकांना हात जोडून विनंती करतो – व्यसनापासून दूर राहा. व्यायाम करा, अभ्यास करा, कौशल्य शिका. व्यसन हे माणसाला आतून पोखरते. त्याला वेळीच आळा घालायला हवा. ग्रामपंचायत यासाठी कठोर पावले उचलायला मागेपुढे पाहणार नाही. आपल्याला व्यसनमुक्त, सुशिक्षित आणि देशभक्त युवा पिढी घडवायची आहे.”

*”मराठी शाळा टिकवूया” चे आवाहन*
सरपंच पुढे म्हणाले, “आज मराठी शाळांची पटसंख्या कमी होत आहे. मराठी शाळा वाचवायच्या असतील तर प्रत्येक पालकाने आपल्या पाल्याला मराठी शाळेतच प्रवेश द्यावा. आपल्या मातृभाषेतून मिळणारे शिक्षण हेच संस्कारक्षम असते. आपण जर आपली शाळा वाचवली नाही तर ती कोण वाचवणार?”

*ग्राम शालेय समितीच्या कार्याचा गौरव*
ग्राम शालेय व सामाजिक उपक्रम समितीने शाळेसाठी हाती घेतलेल्या उपक्रमांमुळे पटसंख्या वाढविण्यास मोठी मदत झाली आहे. शाळेचा दर्जा सुधारण्यासाठी समिती जे काम करत आहे त्याचा आम्हाला अभिमान आहे असे गौरवोद्गार सरपंचांनी काढले.

उपसरपंच *शुभावली सावंत* यांनी मुलींना सर्व क्षेत्रात आघाडी घेण्याचे आवाहन केले. ग्रामपंचायत अधिकारी *रेश्मा माळकर* यांनी शासकीय शैक्षणिक योजनांची माहिती दिली.

*उपस्थिती*
याप्रसंगी तंटामुक्ती अध्यक्ष *सुधीर सावंत*, ग्रामपंचायत सदस्य *तेजस सावंत, दीपक घाडीगावकर, नेहा घाडीगावकर*, मुख्याध्यापक *डोईफोडे सर, प्रभू मॅडम*, शिक्षकवर्ग, कृषी सेविका *चव्हाण मॅडम*, अंगणवाडी सेविका, ग्रामपंचायत कर्मचारी, आशा ताई, प्रतिष्ठित ग्रामस्थ *रमाकांत देवलकर, गणेश मुंबरकर, प्रभाकर कदम*, माजी सरपंच *राजेश फाटक*, *देवा रावले, अमित सावंत, मधुसूदन सावंत, रमेश गावकर, शरद सावंत, प्रसाद कदम, गणेश कदम*, माजी पोलीस पाटील *रविकांत सावंत* यांच्यासह मोठ्या संख्येने ग्रामस्थ उपस्थित होते.

कार्यक्रमाच्या यशस्वीतेसाठी ग्रामपंचायत व शाळेतील सर्वांनी परिश्रम घेतले.तसेच ब्लू स्टार क्रीडा मंडळाचे विशेष योगदान.

—