*जागतिक साहित्य कला व्यक्तित्व विकास मंचचे सन्मा सदस्य ज्येष्ठ कवी चंद्रशेखर कासार लिखित अप्रतिम काव्यरचना*

*काळजातला मोर* 

वाट चंद्राची चकोर पाहतोय चांदण्या रात्रीला

काळजातला मोर नाचतोय साजनाच्या भेटीला ||धृ||

या हो साजना रात बहरली टिपूर चांदण्यात

प्रीतीच्या फुलाचा आलाय बहर ऐन यौवनात

रातराणीचा गंध दरवळला इश्काच्या रातीला

काळजातला मोर नाचतोय साजनाच्या भेटीला ||१||

रोमारोमात नशा सळसळते तुमच्या प्रेमाची

मिठीत यावं सजना ओढ लागली मिलनाची

कबुतराची गुटरं गूं वेड लावी खुळ्या मनाला

काळजातला मोर नाचतोय साजनाच्या भेटीला ||२||

रातकिड्यांची किरकिर करी शांतता भंग

मकरंद चाखायच्या नादात भवरा झाला दंग

अंगा अंगाची लाही संग आस मदनाची रतीला

काळजातला मोर नाचतोय साजनाच्या भेटीला ||३||

कवी :-

*चंद्रशेखर प्रभाकर कासार*

*चांदवडकर, धुळे.*

७५८८३१८५४३.

८२०८६६७४७७.