मोटरसायकलवरून घरी येताना फिट व हृदयविकाराच्या धक्क्याने तरुणाचा मृत्यू

सावंतवाडी बाजारपेठेत घटना; २९ वर्षीय किशोर मेजारी यांचा दुर्दैवी अंत

सावंतवाडी । प्रतिनिधी :

कोलगाव-भोमवाडी येथील एका २९ वर्षीय तरुणाचा मोटरसायकलवरून घरी परतत असताना फिट आल्याने आणि हृदयविकाराच्या धक्क्याने दुर्दैवी मृत्यू झाला. किशोर मुकुंदा मेजारी असे या मृत तरुणाचे नाव असून, या घटनेमुळे परिसरात हळहळ व्यक्त केली जात आहे.
पोलिसांनी दिलेल्या माहितीनुसार, किशोर मेजारी याला गेल्या काही काळापासून हृदयविकार आणि फिट येण्याचा त्रास होता. सोमवार, दि. ४ मे २०२६ रोजी रात्री ८ वाजण्याच्या सुमारास तो आपल्या कामावरून मोटरसायकलने घरी परतत होता. सावंतवाडी बाजारपेठ परिसरातून जात असताना अचानक त्याला फिट आली. त्यामुळे मोटरसायकलवरील ताबा सुटून तो रस्त्याच्या कडेला कोसळला.
रस्त्यावर पडलेल्या किशोरला पाहून स्थानिक नागरिकांनी तातडीने मदतीसाठी धाव घेतली. त्याला उपचारासाठी जवळच्या उपजिल्हा रुग्णालयात दाखल करण्यात आले. मात्र, डॉक्टरांनी तपासणी केल्यानंतर रुग्णालयात दाखल करण्यापूर्वीच त्याचा मृत्यू झाल्याचे घोषित केले.
या घटनेची माहिती मिळताच भोम गावचे पोलीस पाटील श्री. राऊळ यांनी सावंतवाडी पोलीस ठाण्यात खबर दिली. त्यानुसार पोलिसांनी ‘अकस्मात मृत्यू’ म्हणून नोंद केली असून पुढील तपास सुरू आहे.