फ्रिक्वेन्सी प्री-स्कूलचे स्नेहसंमेलन उत्साहात संपन्न

दोडामार्ग :

दोडामार्ग येथील फ्रिक्वेन्सी प्री-स्कूल चे वार्षिक स्नेहसंमेलन उत्साहपूर्ण आणि आनंदी वातावरणात पार पडले. या कार्यक्रमात प्रमुख पाहुणे म्हणून उपस्थित असलेले दोडामार्गचे तहसीलदार राहुल गुरव यांनी मार्गदर्शन करताना सांगितले की, लहान वयात दिले जाणारे शिक्षण आणि संस्कार हेच मुलांच्या उज्ज्वल भविष्याचा भक्कम पाया घडवतात. फ्रिक्वेन्सी प्री-स्कूलकडून दिले जाणारे शिक्षण केवळ शैक्षणिक मर्यादेत न राहता मुलांना सुसंस्कृत घडवणारे असल्याचे त्यांनी नमूद केले.

या कार्यक्रमास पत्रकार तेजस देसाई, जीवन विद्या मिशनचे राजाराम सावंत, नगरसेविका संध्या प्रसादी यांच्यासह पालक व मान्यवर मोठ्या संख्येने उपस्थित होते. कार्यक्रमाची सुरुवात दीपप्रज्वलनाने झाली. त्यानंतर चिमुकल्या विद्यार्थ्यांनी नृत्य, गाणी, अभिनय आणि नाट्यछटा यांचे मनमोहक सादरीकरण केले. विद्यार्थ्यांचा आत्मविश्वास, सादरीकरणातील सहजता आणि सर्जनशीलता पाहून उपस्थित पालक व मान्यवर भारावून गेले.

लहान वयातच संस्कार, आत्मविश्वास आणि सर्जनशीलता विकसित होण्यासाठी अशा उपक्रमांचे महत्त्व मोठे असल्याचे मान्यवरांनी आपल्या मनोगतातून अधोरेखित केले. शिक्षकांचे मार्गदर्शन, पालकांचा उत्स्फूर्त सहभाग आणि विद्यार्थ्यांचा उत्साह यामुळे हे स्नेहसंमेलन अत्यंत यशस्वी ठरले.

कार्यक्रमाचे सूत्रसंचालन शिक्षिका कोमल नाईक यांनी केले. प्रास्ताविक संचालिका कीर्ती खोबरेकर यांनी मांडले, तर आभार शिक्षिका शितल पटकारे यांनी मानले.