पिंगुळीत मंगळसूत्र खेचण्याचा प्रयत्न;

परजिल्ह्यातील दोघे ग्रामस्थांच्या सतर्कतेमुळे पकडले

कुडाळ :
कुडाळ तालुक्यातील पिंगुळी येथे रस्त्याने चालणाऱ्या महिलेच्या गळ्यातील सोन्याचे मंगळसूत्र खेचून पलायन करण्याचा प्रयत्न करणाऱ्या परजिल्ह्यातील दोघांना स्थानिक ग्रामस्थांनी सतर्कता दाखवत पकडले. त्यानंतर ग्रामस्थांनी त्यांना कुडाळ पोलिसांच्या ताब्यात दिले. ही घटना आज (गुरुवारी) दुपारी साडेअडीचच्या सुमारास घडली असून या प्रकारामुळे परिसरात खळबळ उडाली आहे.
पिंगुळी भूपकरवाडी नजीकच्या सद्गुरू नगर परिसरात रस्त्याने चालणाऱ्या एका महिलेला मोटारसायकलवरून आलेल्या दोन इसमांनी ओळखीचा बहाणा करून परिसरातील काही लोकांची नावे सांगत संवाद साधला. त्याच वेळी मोटारसायकलवरील एकाने अचानक त्या महिलेच्या गळ्यातील मंगळसूत्र खेचण्याचा प्रयत्न केला. मात्र महिलेने प्रसंगावधान राखल्याने अनर्थ टळला.
घटनेनंतर दोघेही संशयित मोटारसायकलवरून पळून गेले. मात्र प्रकाराची माहिती मिळताच स्थानिक ग्रामस्थांनी तत्काळ पाठलाग करून काही अंतरावर त्यांना पकडले. त्यानंतर ग्रामस्थांनी संबंधित महिलेसह कुडाळ पोलिस ठाण्यात धाव घेत संपूर्ण हकीकत सांगितली.
पोलिस निरीक्षक राजेंद्र मगदूम यांच्या मार्गदर्शनाखाली कुडाळ पोलिसांनी दोघांना ताब्यात घेऊन पुढील तपास वेगाने सुरू केला आहे. या घटनेमुळे परिसरात भीतीचे वातावरण निर्माण झाले असून नागरिकांनी अधिक सतर्क राहण्याचे आवाहन पोलिसांकडून करण्यात आले आहे.