*दिल्लीने सलग पाचव्यांदा हैदराबादला हरवले*

मुंबई (गुरुदत्त वाकदेकर) :

आयपीएल २०२३ च्या ३४ व्या सामन्यात दिल्ली कॅपिटल्सने सनरायझर्स हैदराबादचा सात धावांनी पराभव केला. नाणेफेक जिंकून प्रथम फलंदाजी करताना दिल्लीने २० षटकांत नऊ गडी गमावून १४४ धावा केल्या. मनीष पांडे आणि अक्षर पटेल यांनी ३४-३४ धावांची खेळी केली.

प्रत्युत्तरात सनरायझर्स हैदराबादचा संघ २० षटकांत ६ गडी गमावून १३७ धावाच करू शकला. मयंक अग्रवालने सर्वाधिक ४९ धावा केल्या. त्याचवेळी हेनरिक क्लासेनने १९ चेंडूत ३१ धावांची खेळी खेळली. आयपीएलच्या १६व्या हंगामांच्या इतिहासात प्रथमच दिल्लीने १५० पेक्षा कमी लक्ष्याचा बचाव केला आहे. हैदराबादवर दिल्लीचा हा सलग पाचवा विजय ठरला.

हैदराबादला शेवटच्या दोन षटकात २३ धावांची गरज होती. त्यानंतर वॉशिंग्टन सुंदर आणि हेनरिक क्लासेन खेळपट्टीवर होते. १९व्या षटकात १० धावा झाल्या आणि संघाने क्लासेनची विकेट गमावली. यानंतर हैदराबादला शेवटच्या षटकात १३ धावांची गरज होती. मुकेश कुमार गोलंदाजीला आला. वॉशिंग्टन सुंदर आणि मार्को जॅन्सन फलंदाजी करत होते.

सुंदरने पहिल्याच चेंडूवर दोन धावा घेतल्या. यानंतर पुढचा चेंडू निर्धाव होता. तिसऱ्या चेंडूवर एकेरी धाव निघाली. चौथ्या चेंडूवर जॅनसेननेही एकच धाव घेतली. पाचव्या चेंडूवर मुकेशने एकेरी धाव घेतली. त्याचवेळी दिल्लीला शेवटच्या चेंडूवर आठ धावांची गरज होती, जी जवळपास अशक्य होती. शेवटच्या चेंडूवर मुकेशने एकही धाव दिली नाही. अशाप्रकारे दिल्लीने सात धावांनी विजय मिळवला.

या विजयासह दिल्लीचे सात सामन्यांत दोन विजय आणि पाच पराभवांसह चार गुण झाले आहेत. संघ अजूनही शेवटच्या म्हणजे १०व्या स्थानावर आहे. त्याचबरोबर हैदराबादनेही सातपैकी दोन सामने जिंकले आहेत. संघ पाचमध्ये पराभूत झाला आहे आणि चार गुणांसह नवव्या स्थानावर आहे.

दोन्ही संघांमध्ये आतापर्यंत २२ सामने खेळले गेले आहेत, त्यापैकी हैदराबादने ११ सामने जिंकले असून आजच्या विजयासह दिल्लीनेही ११ सामने जिंकले आहेत. हे दोन्ही संघ हैदराबादमध्ये सहा वेळा आमनेसामने आले आहेत. यातील हैदराबादने तीन तर दिल्लीनेही तीन सामने जिंकले आहेत. गेल्या सहा सामन्यांमध्ये हे दोन्ही संघ सामोरे आले असताना दिल्लीने सलग पाच सामने जिंकले. त्याचवेळी हैदराबादने २७ ऑक्टोबर २०२० रोजी दिल्लीविरुद्ध शेवटचा विजय मिळवला होता.

प्रथम फलंदाजी करताना दिल्लीची सुरुवात खूपच खराब झाली. पहिल्याच षटकात भुवनेश्वरने फिलिप सॉल्टला यष्टिरक्षक क्लासेनकरवी झेलबाद केले. सॉल्टला खातेही उघडता आले नाही. यानंतर कर्णधार डेव्हिड वॉर्नर आणि मिचेल मार्श यांनी दुसऱ्या विकेटसाठी ३८ धावांची भागीदारी केली. मिशेलला टी नटराजनने पायचीत केले. मार्शला १५ चेंडूत पाच चौकारांच्या मदतीने २५ धावा करता आल्या.

यानंतर वॉशिंग्टन सुंदरची घातक गोलंदाजी पाहायला मिळाली. आठव्या षटकात त्याने तीन बळी घेतले. सर्वप्रथम सुंदरने वॉर्नरला हॅरी ब्रूककरवी झेलबाद केले. त्याला २० चेंडूत २ चौकार आणि एका षटकाराच्या मदतीने २१ धावा करता आल्या. यानंतर सर्फराजने खराब फटका खेळून आपली विकेट गमावली. त्याने भुवनेश्वरकडे झेल सोपवला. सर्फराजला नऊ चेंडूत १० धावा करता आल्या. यानंतर फलंदाजीला आलेला अमन हकीम खानही त्याच षटकाच्या शेवटच्या चेंडूवर बाद झाला. सुंदरने त्याला अभिषेक शर्माकरवी झेलबाद केले. अमनला चार धावा करता आल्या.

६२ धावांत पाच विकेट पडल्यानंतर मनीष पांडे आणि अक्षर पटेल यांनी सहाव्या विकेटसाठी ६० चेंडूत ६९ धावांची भागीदारी केली. अक्षर पटेल १८व्या षटकात बाद झाला. त्याला भुवनेश्वरने त्रिफळाचीत केले. अक्षरने ३४ चेंडूंत चार चौकारांच्या मदतीने ३४ धावांची खेळी खेळली. यानंतर मनीष पांडे धावबाद झाला. त्याला २७ चेंडूंत २ चौकारांच्या मदतीने ३४ धावा करता आल्या. रिपल पटेल सहा चेंडूत पाच धावा करून धावबाद झाला आणि अॅनरिक नॉर्टजेने दोन धावा केल्या. तीन चेंडूत चार धावा केल्यानंतर कुलदीप नाबाद राहिला आणि इशांत शर्माने एक धाव घेतली.

भुवनेश्वरने चार षटकांत ११ धावा देत दोन बळी घेतले. त्याचवेळी वॉशिंग्टन सुंदरने चार षटकांत २८ धावा देत तीन बळी घेतले. टी नटराजनने तीन षटकांत २१ धावा देत मिचेल मार्शची महत्त्वपूर्ण विकेट घेतली.

१४५ धावांच्या लक्ष्याचा पाठलाग करताना हैदराबाद संघाची सुरुवात खराब झाली. या आयपीएलचा पहिला शतकवीर हॅरी ब्रूक १४ चेंडूत ७ धावा करून बाद झाला. यानंतर मयंक अग्रवाल आणि राहुल त्रिपाठी यांनी दुसऱ्या विकेटसाठी ३८ धावांची भागीदारी केली. मयंकचे अर्धशतक एका धावेने हुकले. तो ३९ चेंडूंत सात चौकारांच्या मदतीने ४९ धावा करून बाद झाला. त्याचवेळी राहुल त्रिपाठी २१ चेंडूत १५ धावा करून बाद झाला. अक्षरने कुलदीपला अभिषेक शर्मा (५) आणि एडन मार्कराम (३) यांना तंबूमध्ये पाठवले. क्लासेन आणि सुंदरने डाव सांभाळण्याचा प्रयत्न केला आणि सहाव्या विकेटसाठी ४१ धावांची भागीदारी केली. क्लासेन १९व्या षटकात अमन खानच्या हाती नॉर्टजेकरवी झेलबाद झाला. त्याला १९ चेंडूत तीन चौकार आणि एका षटकाराच्या मदतीने ३१ धावा करता आल्या. सरतेशेवटी, सुंदरने १५ चेंडूंत तीन चौकारांच्या मदतीने २४ धावा केल्यानंतर नाबाद राहिला आणि मार्को जॅनसेनने दोन धावा केल्या, मात्र संघाला विजय मिळवून देऊ शकला नाही. दिल्लीकडून नॉर्टजे आणि अक्षर यांनी प्रत्येकी दोन गडी बाद केले. त्याचवेळी इशांत शर्मा आणि कुलदीप यादव यांना प्रत्येकी एक विकेट मिळाली.

अक्षर पटेलला सामनावीर पुरस्काराने गौरविण्यात आले.