*आयपीएलमध्ये लखनौवर चेन्नईचा पहिला विजय, ऋतुराज गायकवाड आणि मोईन अली ठरले हिरो*
*४० षटकांत ४२२ धावांचा पाऊस*
मुंबई (गुरुदत्त वाकदेकर) : चेन्नई सुपर किंग्जने लखनौ सुपर जायंट्सचा त्यांच्या घरच्या मैदान एमए चिंदरबम स्टेडियमवर १२ धावांनी पराभव केला. महेंद्रसिंग धोनीच्या संघाचा या मोसमातील हा पहिला विजय आहे. गेल्या सामन्यात त्याला गुजरात टायटन्सविरुद्ध पराभव स्वीकारावा लागला होता. चेन्नईचा संघ २०१९ नंतर या मैदानावर खेळायला आला होता. त्यांनी घरवापसी संस्मरणीय बनवली आणि लखनौला एका अटीतटीच्या सामन्यात पराभूत केले.
आयपीएलमधील लखनऊ सुपरजायंट्सविरुद्ध चेन्नईचा हा पहिला विजय आहे. याआधी गेल्या वर्षी दोन्ही संघांमध्ये एकमेव सामना झाला होता. त्यात लखनौला यश मिळाले. चेन्नई संघाचे घरच्या मैदानावर वर्चस्व आहे. या मैदानावर त्याने मागील २२ पैकी १९ सामने जिंकले आहेत. केवळ तीन सामन्यांत त्यांचा पराभव झाला आहे.
लखनौचा कर्णधार केएल राहुलने नाणेफेक जिंकून प्रथम गोलंदाजी करण्याचा निर्णय घेतला. चेन्नईने २० षटकांत सात विकेट गमावत २१७ धावा केल्या. प्रत्युत्तरात लखनौचा संघ २० षटकांत सात गडी गमावून २०५ धावाच करू शकला. या सामन्यात एकूण ४२२ धावा झाल्या. लखनौचा या स्पर्धेतील हा पहिलाच पराभव आहे. शेवटच्या सामन्यात लखनौने दिल्ली कॅपिटल्सचा पराभव केला. चेन्नई सुपर किंग्ज संघ आता ८ एप्रिल रोजी वानखेडे स्टेडियमवर कट्टर प्रतिस्पर्धी मुंबई इंडियन्स विरुद्ध खेळणार आहे. त्याचवेळी लखनौला ७ एप्रिलला सनरायझर्स हैदराबादविरुद्ध त्यांच्या घरच्या मैदानावर खेळायचे आहे.
२१८ धावांच्या लक्ष्याचा पाठलाग करताना लखनौ सुपर जायंट्सची सुरुवात चांगली झाली. पहिल्या सहा षटकात त्यांनी ८० धावा केल्या होत्या. काइल मेयर्सने २२ चेंडूत ५३ धावांची खेळी केली. त्याने आठ चौकार आणि दोन षटकार मारले. त्याने कर्णधार केएल राहुलसोबत पहिल्या विकेटसाठी ७९ धावांची भागीदारी केली. सहाव्या षटकातील तिसऱ्या चेंडूवर तो बाद झाला. मेयर्स बाद झाल्यानंतर लखनौला ठराविक अंतराने धक्के बसले. यामुळे संघाला पराभवाला सामोरे जावे लागले.
निकोलस पूरनने १८ चेंडूत ३२ धावांची खेळी केली. त्याने दोन चौकार आणि तीन षटकार मारले. जोपर्यंत पूरन खेळपट्टीवर होता तोपर्यंत तो लखनौच सामना जिंकेल असे वाटत होते. १६व्या षटकाच्या शेवटच्या चेंडूवर तो बाद झाल्यानंतर लखनौच्या आशा जवळपास संपुष्टात आल्या होत्या. आयुष बडोनीने १८ चेंडूत २३, कृष्णप्पा गौतमने ११ चेंडूत नाबाद १७ आणि मार्क वुडने तीन चेंडूत नाबाद १० धावा केल्या, मात्र हे खेळाडू संघाला विजय मिळवून देऊ शकले नाहीत. मार्कस स्टॉइनिसने १८ चेंडूत २१ आणि कर्णधार केएल राहुलने १८ चेंडूत २० धावा केल्या. कृणाल पंड्या नऊ आणि दीपक हुडा दोन धावा करून बाद झाले. चेन्नईकडून मोईन अलीने चार आणि तुषार देशपांडेने दोन गडी बाद केले. मिचेल सँटनरने एक गडी बाद केला.
अंबाती रायडूच्या जागी तुषार प्रभावशाली खेळाडू म्हणून या सामन्यात उतरला. गुजरातविरुद्धही तो प्रभावशाली खेळाडू होता, पण त्या सामन्यात तो फार काही करू शकला नाही. या सामन्यात पहिले षटक महागडे ठरल्यानंतर त्याने पुनरागमन करत दोन बळी घेत चेन्नईच्या विजयात मोलाची भूमिका बजावली. त्याने शेवटच्या षटकात स्वतःला रोखले आणि निकोलस पूरननंतर आयुष बडोनीला बाद केले.
तत्पूर्वी, ऋतुराज गायकवाड आणि डेव्हॉन कॉनवे यांनी चेन्नई सुपर किंग्जला चांगली सुरुवात करून दिली. ऋतुराजने सलग दुसऱ्या सामन्यात अर्धशतक झळकावले. त्याने ३१ चेंडूत ५७ धावांची खेळी केली. यादरम्यान गायकवाडने तीन चौकार आणि चार षटकार मारले. ऋतुराजशिवाय डेव्हन कॉनवेने २९ चेंडूत ४७ धावांची खेळी खेळली. त्याने पाच चौकार आणि दोन षटकार मारले. गायकवाड आणि कॉनवे यांनी पहिल्या विकेटसाठी ९.१ षटकांत ११० धावांची भागीदारी केली.
अंबाती रायडूने १४ चेंडूत २७ धावा केल्यानंतर नाबाद राहिला. त्याने दोन चौकार आणि दोन षटकार मारले. शिवम दुबेने १६ चेंडूत २७ धावा केल्या. मोईन अलीने १३ चेंडूत १९ धावांचे योगदान दिले. कर्णधार महेंद्रसिंग धोनीने तीन चेंडूंचा सामना केला. त्याने पहिल्या दोन चेंडूत दोन षटकार ठोकले. तिसऱ्या चेंडूवर मार्क वुडने त्याला आयुष बडोनीकरवी झेलबाद केले. धोनीचा स्ट्राईक रेट ४०० होता. धोनीच्या १२ धावाच अखेर लखनौवर भारी पडल्या कारण तितक्याच धावांनी चेन्नईचा विजय झाला. बेन स्टोक्स आठ आणि रवींद्र जडेजा तीन धावा करून बाद झाले. मिचेल सँटनर एक धाव घेत नाबाद राहिला. मार्क वुड आणि रवी बिश्नोई यांनी प्रत्येकी तीन बळी घेतले. आवेश खानला एक गडी बाद करता आला.
मोईन अलीला सामनावीर पुरस्काराने गौरविण्यात आले.
