*राजस्थान रॉयल्सची विजयी सुरुवात, हैदराबादचा ७२ धावांनी पराभव, चहल-बोल्ट चमकले*

मुंबई (गुरुदत्त वाकदेकर) :

गेल्या मोसमातील उपविजेता संघ राजस्थान रॉयल्सने या मोसमातही विजयाने आपल्या मोहिमेची सुरुवात केली आहे. राजस्थानने पहिल्या सामन्यात सनरायझर्स हैदराबादचा ७२ धावांनी पराभव केला आहे. हैदराबाद यंदाच्या मोसमात घरच्या मैदानावर पराभूत होणारा पहिला संघ ठरला आहे. प्रथम फलंदाजी करताना राजस्थानने २० षटकांत ५ गडी गमावून २०३ धावा केल्या होत्या. प्रत्युत्तरात हैदराबादचा संघ २० षटकांत ८ गडी गमावून केवळ १३१ धावा करू शकला आणि सामना गमावला.

राजस्थानकडून जोस बटलर, यशस्वी जैस्वाल आणि संजू सॅमसन यांनी अर्धशतके झळकावली. त्याचवेळी बोल्टने दोन आणि चहलने चार विकेट घेतल्या. तर हैदराबादकडून अब्दुल समदने सर्वाधिक नाबाद ३२ धावा केल्या.

नाणेफेक गमावल्यानंतर प्रथम फलंदाजी करणाऱ्या राजस्थानची सुरुवात चांगली झाली. यशस्वी जैस्वाल आणि जोस बटलर यांनी आक्रमक फलंदाजी करत पहिल्या विकेटसाठी ८५ धावा जोडल्या. पॉवरप्लेनंतर या संघाची धावसंख्या एका विकेटवर ८५ धावा झाली. जोस बटलर २२ चेंडूत ५४ धावा काढून बाद झाला, पण जैस्वाल आणि संजू सॅमसनने वेगवान धावा सुरूच ठेवल्या. जयस्वाल ३७ चेंडूत ५४ धावा करून बाद झाला. दरम्यान, देवदत्त पडिक्कल (दोन धावा) आणि रियान पराग (सात धावा) यांनी निराशा केली, पण सॅमसनने धावगती कमी होऊ दिली नाही. राजस्थान संघाची धावगती १० च्या अासपास राहिली.

संजू सॅमसन डावाच्या १९व्या षटकात ३२ चेंडूत ५५ धावा काढून बाद झाला. मात्र, तोपर्यंत हेटमायर लयीत आला होता. त्याने १६ चेंडूत २२ धावांची नाबाद खेळी खेळली. हैदराबादच्या गोलंदाजांनी शेवटच्या षटकांमध्ये चांगली कामगिरी केली, पण राजस्थानच्या संघाला पाच गड्यांच्या मोबदल्यात २०३ धावा करता आल्या.

हैदराबादकडून फजलहक फारुकी आणि टी नटराजन यांनी प्रत्येकी दोन गडी बाद केले. त्याचवेळी उमरान मलिकला ब्रेकथ्रू मिळाला. मात्र, हैदराबादच्या चार गोलंदाजांचा इकॉनॉमी रेट १० पेक्षा जास्त होता. फक्त टी नटराज (७.७०) आणि आदिल रशीद (८.२०) किरकोळ किफायतशीर ठरले.

२०४ धावांच्या मोठ्या लक्ष्याचा पाठलाग करताना हैदराबाद संघाला पॉवरप्लेमध्ये मोठी धावसंख्या उभारण्याची गरज होती, मात्र या संघाला ते शक्य झाले नाही. डावाच्या तिसऱ्या चेंडूवर बोल्टने अभिषेक शर्माला बोल्ड केले. त्याच षटकातील पाचव्या चेंडूवर त्याने राहुल त्रिपाठीला स्लिपमध्ये झेलबाद केले. हैदराबादचे खाते उघडण्यापूर्वीच दोन फलंदाज पॅव्हेलियनमध्ये परतले होते. येथूनच या संघासाठी विजय अवघड झाला.

मयंक अग्रवालने हॅरी ब्रूकच्या साथीने डाव सांभाळण्याचा प्रयत्न केला, पण ब्रुक २१ चेंडूत १३ धावा करून बाद झाला. यानंतर हैदराबादच्या विकेट्स ठराविक अंतराने पडत राहिल्या. या संघाने अब्दुल समदलाही प्रभावशाली खेळाडू म्हणून मैदानात पाठवले, पण तोही काही विशेष करू शकला नाही आणि हा संघ सामना हरला.

या सामन्यात सनरायझर्स हैदराबादचे पाच फलंदाज दुहेरी आकड्याला स्पर्श करू शकले नाहीत. अभिषेक शर्मा आणि राहुल त्रिपाठी यांना खातेही उघडता आले नाही. त्याचवेळी वॉशिंग्टन सुंदर एका धावेवर, ग्लेन फिलिप्स आठ धावांवर आणि कर्णधार भुवनेश्वर कुमार सहा धावांवर बाद झाला.

राजस्थान रॉयल्ससाठी, प्रथम ट्रेंट बोल्ट नंतर युझवेंद्र चहलने चेंडूने आश्चर्यकारक कामगिरी केली. बोल्टने पहिल्याच षटकात दोन विकेट घेत हैदराबादला पिछाडीवर आणले. त्याचप्रमाणे चहलने मधल्या षटकांमध्ये चार विकेट घेतल्या. या दोघांशिवाय जेसन होल्डर आणि रविचंद्रन अश्विनला प्रत्येकी एक विकेट मिळाली. या सामन्यात नवदीप सैनी हा एकमेव राजस्थानचा गोलंदाज होता, ज्याचा इकॉनॉमी रेट १० पेक्षा जास्त होता. सैनीने दोन षटकात ३४ धावा दिल्या.

जोस बटलरला सामनावीर पुरस्काराने गौरविण्यात आले.