बांदा
पाडलोस मधील कालव्याच्या पुलावरील रस्त्याचे काम करून पंधरा दिवसांचा कालावधी उलटला नसतानाही रस्ता उखडला. त्यानंतर प्रशासनाकडे खडीकरण व डांबरीकरण करण्यासाठी वारंवार मागणी करूनही दुर्लक्ष होत आहे. अशा धोकादायक कामाकडे लक्ष वेधण्यासाठी तसेच अधिकाऱ्यांना जाग येण्यासाठी कोणतेही निवेदन न देता पावसाळ्यात रस्त्यावरील खड्ड्यांत फलक लावून वृक्षारोपण करणार असल्याचा इशारा, पाडलोस ग्रा.पं.सदस्य लिना माधव यांनी प्रशासनास दिला आहे.
खडीकरण व डांबरीकरण केलेल्या रस्त्यावर पंधरा दिवसांत खड्डे पडल्याने अशा बेजाबदार कामाची चौकशी करण्याची तसदीही अधिकारी घेत नाहीत. दुसरीकडे बांदा-शिरोडा मार्गावर पाडलोसमध्ये सर्वत्रच खड्डे पडले आहेत. परंतु अधिकाऱ्यांनी डोळ्यावर पट्टी बांधली की काय असा सवाल वाहनचालक व प्रवाशांमधून होत आहे.
पाडलोस-मडुरा भागातील सीमाभागात तसेच केणीवाडा येथे रस्त्यावर मोठ्याप्रमाणात खड्डे पडले असून येत्या दहा दिवसांत तात्पुरत्या स्वरुपात तरी डागडुजी न केल्यास आम्ही ग्रामस्थांसहीत पदाधिकारी खड्ड्यात वृक्षारोपण करून त्यावर फलक लावणार असल्याचा इशारा सौ.माधव यांनी दिला.
