मुंबई दूरदर्शनच्या वृत्तविभागात सहसंपादिका म्हणून काम केलेल्या लेखिका कवयित्री अलका नाडकर्णी यांची अप्रतिम गझल रचना

लांबलेल्या पावसाचे थेंब पडले आज थोडे
लोपल्या आशेस ओले कोंब फुटले आज थोडे

पेटुनी उठला नभाचा घुमट ज्वाळांनी रवीच्या
विझवण्या ती आग काळे मेघ जमले आज थोडे

युगयुगांच्या तापलेल्या भूवरी पडताच पाणी
अत्तराचे दाटलेले लोट उठले आज थोडे

गारव्याची वाट पाहत थांबले होते बियाणे
कोवळे हिरवे मृदुल उन्मेष हसले आज थोडे

पावसाविण कातळातुन वाळलेल्या निर्झरांना
वाहते होण्या पुन्हा आदेश सुटले आज थोडे

थांबले होते नद्यांचे साचलेले डोह काळे
भेटण्या त्यांना नवे ओहोळ झरले आज थोडे

सोसला विरहात मी सांगू कशी सारा उन्हाळा
मीलनाचे रे तुझ्या संकेत दिसले आज थोडे

अलका नाडकर्णी.
मुंबई.
९८२१३ ०८३५९