जागतिक साहित्य कला व्यक्तीत्व विकास मंचचे ज्येष्ठ सदस्य कवी लेखक श्री अरविंदजी ढवळीकर यांची काव्यरचना

मी भाग्यवंत आहे हे आज मानले मी
जो भाग्य घडविणारा त्यालाच पूजिले मी ll
ते राम रूप वसले
ठायी तया अतर्क्य
गुरु माऊलीस माझ्या
काहींच ना अशक्य
विश्वास व्यापणाऱ्या तेजास स्पर्शिले मी ll
होती मनात इच्छा
सेवा अशी घडावी
ही भाव शब्द सुमने
पायी तुम्हा पडावी
हृदयात नाम मूर्ती ज्या सर्वस्व अर्पिले मी ll
पूर्णत्व द्या आयुष्या
राहो उणे न कांही
शिरी हात द्या कृपेचा
ना अन्य मागणे ही
हातास ही न कळले कि हात जोडले मी ll
हा जन्म हा प्रपंच
मी जाणून रंगमंच
द्या न्याय भूमिके मज
या दिग्दर्शना तुम्हीच
तव दर्शनात अवघ्या प्राणास वाहिले मी ll
मी भाग्यवंत आहे हे आज मानले मी ll
जो भाग्य घडविणारा त्यालाच पूजिले मी

अरविंद